Hêrişê îşxalî yê dewleta tirke yê vera Herêmanê Pawitişî yê Medya 14ê nîsana 2022yî ra nata dewam kenê. Artêşa tirke ya îşxalkere pê gerîlayan nêeşkaye û teng bîye coka metodê gemarinî vistî dewre. Her roje tunel û çeperê şerî yê gerîlayan dîyenê bombayan ver.

Dewleta îşxalkere bi destekê NATOyî pêro îmkananê teknolojîkan ra îstîfade kena û cografayay Kurdîstanî bi bombaya nuklere û çekanê kîmyewîyan dana bombayan ver. 

Xeylêk reyî bi dîmenan sûcê şerî yê dewleta tirke ya îşxalkere eşkera bîyî. Dîmenê neweyî yê serê nê sûcan zî vejîyayî werte. Bi kamera dîmenê leşkeranê tirkan ê îşxalkeran ameyî girewtene. Dîmenan de aseno ke nê leşkerî seba ke bi bombaya nuklere û çeka kîmyewîye hêrişê tunelanê şerî yê Şehîd Hêjarî yê Warê Xoverdayîşî yê Girê Hekarî bikerê amadekarîye kenê.

Dîmenan de aseno ke leşkerê tirkî yê îşxalkerî bi bandan dormeyê teqaberan monte kenê û bombayê taybetî yê ke tesîrê bombaya nuklere virazenê dîyar benê. Leşkerî bombaya nuklere benê verê cayêkî. Îşxalkerî bombayan kenê verarê xo û pê fotografanê xo gênê.

Îşxalkerî xîret kenê ke bi teqayîşanê pîlan xoverdayîşê gerîlayan bişiknê, tunelanê şerî bidê bombayan ver.

Merkezê Îrtîbatî û Çapemenîye yê HPGyî eşkerayîya xo ya 17ê tenaxe de dabi zanayene ke artêşa îşxalkere 4 menganê peyênan de vera tunel û çeperanê şerî yê Waranê Xoverdayîşî hezar û 532 reyî çeka kîmyewîye û bombaya nuklere şuxilnaya.