Heyetê HDP, DBP û Îtîafaqê Kurdîstanî seba ke karkeranê ke Sakarya de înan rê hêrişo nîjadperest ame kerdene, zîyaret bikero, şiyî dewa Kelekê ya Şemrexî ya Mêrdînî. Heyetê hetê leşkeranê tirke ra ame astengkerdene.

Vervatoxa Partîya Demokratîke ya Şaran (HDP) Ebru Gunay, Serrekwekîla Koma HDPyî Merale Daniş Beştaş, Hemserka Pêroyî ya Partîya Herêmanê Demokratîkan (DBP) Salîha Aydenîze, Palamenterê HDPyî Îmam Taşçier û Nusrettîn Maçîn, Serekê Pêroyî yê Partîya Komunîste ya Kurdan (KKP) Sînan Çîftyurek,bi nameyê Partîya Azadîye, Komeleya Şorişgêran ê Demokratîkan a Kurdan (DDKD), Abdulhay Okumuş,bi nameyê Partîya Azadîye Cemal Sati, bi nameyê Partîya Merdimî û Azadîye (PÎA) Ahmet Kayayî heyet de ca girewt.

Astengkerdişê zîyaretî  ser o heyetê Sultan Şeymus de eşkerayîyêke daye. Eşkerayîye de bi nameyê Îtîfaqê Kurdîstanî Sînan Çîfyurekî û bi nameyê HDPyî Merale Daniş Beştaş qisey kerd.

Sînan Çîftyurekî vera astengkerdişî hêrsê xo ard ziwan û vat seba ke ê kurdê înan rê hêriş ame kerdene ke çîyo winayên nîno qebulkerdene.

Merale Daniş Beştaş vat: ''Şarê kurdî têna nîyo. Eke yewîya na herre yena waştene gerek her kes eynî şertan de biciwîyo.Eke kurdî bajaranê sey Sakaraya, Mugla û Yozgat de raştê hêrişî yenê nê welatî de demokrasî û seyyewbînîye çîn a. Ez veng dana îqtîdarî ke wa hêrişkaran tepişo. Înanê ke talîmat dayo wa bêrê cezakerdene. Eke paştî bidîyo înan hêrişî hena zêdîyenê. Kurdî tîya dejo pîl ancenê. Êyê ke wayûbiratîya şaran wazenê û vanê ez merdim a gerek vera nê qewimîyayîşî vengê xo berz bikerê. Dewleta ke Sakarya de hêrişkarî pawitî ewro Şemrex de vejîyaye werte. Eke kurdî Sakarya, Anqara û Yogat de nêeşkenê bigerî, tehluke zaf pîl o. Êyê ke ma rê vanê cîyakar, tarîxê cîyakarîye nusenê.''