Keyeyê Aslanî dewa Hewrê ya qezaya Karazî ya Amedî ra yo. Keyeyî serra 1970î de dewe ra koçê şaristanî kerd. 3 bira û 7 wayan goreyê şertanê şaristanî xîret kerd ke cuya xo rê dewam bikerê. Dima ke ê koçê Amedî kenê birayan ra Mehmet Aslan zanîngehî ra dima tewrê gerîlayan beno.

Birayo pîl Ahmet Aslanî wina qala ê rojan keno: ''Birayê mi Mehmet serra 1991î de Fakulteya Muhendîsîya Înşaatî ya Dîcle ra mezun bi. Birayê mi Welat zî wexto ke ma koçê şaristanî kerd tîya de dadîya xo rani. Dibistanê mîyanêne, verêne û lîse Amed de qedînayî. dima Îstanbul Teknîk de Muhendîsîya Elektrîkî qezançe kerde. Wexto ke uca de wendêne ame destbendkerdene û zîndan de mend. Dima werte ra vînî bi. Birayê mi Mehmey zî wexto ke şantîye e xebitîyayêne werte ra vînî bi. Dima ma musayî ke ê tewrê têgêrayîşê azadîye bîyî.''

Ahmet Aslanî heta ke birayanê xo ra xebere bigêro têgêreno, o çax museno ke wirdî zî tarîxanê cîya-cîyayan de şehîd bîyî. Birayan ra yew taxa Şehîdlîkî ya amedî de ameyo definkerdene. La Ahmet Aslan hema cenazaya birayê xo yê bînî nêdîyaye. Goreyê agahîyanê ke ey girewtê birayê ci dewêka Çewlîgî de definkerde yo. Aslanî vat: ''Dima ma musayî ke cenazaya ci na dewe de ya. Wexto ke ma şîyî o ca ma erdêko duz dî. Ma nêdî ke ça de definkerde yo. Hema zi ma têna mewkî zanenê.''

Aslanî vat 2013 de lajê ey Firat kewt peyê rayîrê apanê xo. Aslanî vat: ''Heta nika Alî Firatî ra zî ma qet agahîyêke nêgirewte. Ma serewedaritişê Şêx Seîdî ra nata xeta xo ya neteweyî ra dûr nêkewtî. Ma nêeşkenê hîsanê dadîyan vajê. Ewnîyayîşê ci yê dêsan, baldarbîyayîşê ci yê serê vengê zingilê berî merdim nêeşkeno nê hîsan pênase bikero. La pir dejîn o. Babîyê mi zî wina bi. Wexto ke nimaj kerdêne vatêne 'Ax Welat, ax Welat'. Dima ke lajê mi şi koyan mi hîsê înan zêdêr fam kerdî.''

Aslanî peynîya qiseykerdişê xo de vat ê têna wazenê gorê birayê xo bivînê û vat: ''Birayê mi perwerdeyo akademîk dîbî. Eke biwaştêne ameyêne cayanê weşan la ey no rayîr weçîna. Ma tim do xeta xo ser o şorê.''