Cenazaya gerîlayê HPGyî Sefa Kizilkayayo ke Bedlîs de hêrişê hewayî de şehîd bi, Amed de ameye definkerdene.

Gerîlayê HPGyî Sefa Kizilkaya 13ê tebaxe de Bedlîs de hêrişêkê hewayî de şehîd bibi. Keyeyê Kizilkayayî 7ê êlule de seba ke cenaza bigêro muracatê Serdozgerîya Komare ya Bursa kerd. Keye erşawîya Wan û cenaza teşhîs kerde. Cenazaya Kizilkayayî goristanê bêkesan ra gêrîyaye û şewe Goristanê Yenîkoyî yê qezaya Rezanî yê Amedî de ameye definkerdene.

Cenaza binê ablûqaya polîsan de ameye definkerdene. Polîsan nêverda ke endamanê keyeyî ra berî çew tewrê merasîmê definkerdişî bibo. Polîsan asteng kerd ke îdarekarê MEBYA-DERî û hemwelatîyî şorê goristan.