Cenazayê gerîlayanê HPGyî Salîh Ekîncî (Devran Demîr) û Îzzet Yîgît (Fîraz Amed) ê ke 9ê hezîrane de qezaya Mîyaranî ya Xarpêtî de şehîd bîyî, 85 rojan ra dima teslîmê keyeyanê ci ameyî kerdene. Selahîyetdaranê Mudirîya Asayîşî ya Xarpêtî keyeyan reyde têkilîye naye ro û vat: ''Testê DNA kifş bîyî. Wesayîtê cenaza bigêrê û berê.''

Keyeyan vizêr morgê Nêweşxaneyê Dewlete yê Xarpêtî ra cenazayî girewtî û pê îmkananê xo berdî welatê xo. Cenazaya Yîgîtî qezaya Çêrmûge ya Amedî de, cenazaya Ekîncîyî zî qezaya Wêranşerî ya Riha de ameyî definkerdene.

Keyeyê Yîgîtî waşt ke cenazaya ci kişta gorê xalê ci Yusuf Dalkiliçî de defin bikero ke Dalkiliç serra 2017î de qezaya Dara Hênî ya Çewlîgî de şehîd bibî. La qeymeqamîye nêverda. Dima keyeyî cenaza taxa Çukurî de defin kerde. Endamê keyeyî, îdarekarê MEBYA-DERî zî tewrê merasîmî bîyî.