Îdarekara Komeleya Cigêrayîşê Kultur, Huner û Ziwanê kurdkî (DÎSA-DER) Meryeme Tuncer serra 1990 de koçê Mersînî kerda û Emîne Şaybak zî dengbêj a û bi nameyê Dayîka Sîsê zanîyena. Wird cinîyan hêrişê vera ziwanê kurdkî û kurdan ercnayî. 

Meryeme Tuncer pare kerd ke ganî vera ziwanî şarî rêzdarî bêro ramojnayîş û vat: ''Kesê ke wazenê ziwan û kulturê kurdî çin bikerê, do nêresê amancê xo. Ziwanê her şarî esto û ma senî ke rêzdarî mojnenê zwanê înan , ganî ê zî verê ziwanê ma de rêzdar bê. Gelo ê eşkenê kurdkî qisey bikerê? Nê. Ma zî nêeşkenê tirkî qisey bikerê. Ma sey kurd ameyî dinya. Ma hewnê xo bi kurdî vînenê. Ma kurd ê la ê ma qebûl nêkenê.''

Meryeme bale ante hêrişê vera karkeran ê kurdan ê Sakarya ser û wina vat: “Hêrişê Sakarya kezeba ma vêşna. Ez hêriş şermezar kena. Herinda Sakarya de Wan, Amed û Mêrdîn de kar bikerê. Wa şarê ma nêşêro şaristananê bînan.”

Emîne Şaybake (Sîsê) zî ard ziwna ke dayîka ci heta ke merda kurdkî qisey kerda û ê zî heta ke weş bibê do kurdkî qisey bikerê. Sîsê vat: ''Tirk, fars, ereb her kes bi ziwanê xo qisey keno la ma nêeşkenê kurdkî qisey bikerê. Ma zî wazenê kurdkî qisey bikerê. Xeylê şaristanan de seba ke kurdkî qisey kenê kurdî yenê îşkencekerdene, yenê qetilkerdene. Eke mektebê kurdkî abibê, do domanî bi ziwanê xo qisey bikerê. Keyeyî  domananê xo rê tirkî musnenê. Domanî zî tirkî musenê. No çîyêko şaş o. Ganî wina nêbo.”

Emîne tewr peyêne de wina vat: “Kurdî û kurdkî her wext rastê tedayan yenê. Cinî, doman û ciwanê ma yenê qetikerdene. Rastê şîdetî yenê. Nê hêrişî tena Sakarya de nê, her ca de yenê kerdene.  Ma şinê nêweşxane, ma nêeşkenê derdê xo vajê. Doktorî ma ra fam nêkenê. Hêrişê vera ziwanî zêdîyayî la ez do tim keyeyê xo de domananê xo reyde bi kurdkî qisey bikera,  her ca de bi kurdkî qisey bikera.”