Kampa Multecîyan a Şehîd Rûstem Cûdîyî (Mexmûr) de rayberîya Têgêrayîşê Cinîyan ê Ciwanan ê Mexmûrî (TJCM) û Têgêrayîşê Ciwanan ê Mexmûrî (TCM) de bi rayraşîyayîşêkê bi meşaleyan Komployo Mîyanneteweyî yê 9ê Teşrîna Verêne yê vera Rayberê Şarê Kurdî Abdullah Ocalanî ame protestokerdene.

Girse verê Keyeyanê Şehîdan ra heta Ofîsê Neteweyan ê Yewbîyayeyan rayîrî ra şi. Rayraşîyayîş de fotografê Abdullah Ocalanî, pankartê bi nuşteyê 'Biciwîyo Serek Apo', 'Ciwanî fedayîyê Rayber Apoyî yê' ameyî kiriştene.

Dima ciwanan xeymêke akerde. Na xeyme de ciwanî heta 9ê teşrîna verêne çalakîyanê xo rê dewam bikerê. Verê xeyme de Vervatoxa TJCMyî Kajîne Ozek eşkerayîye daye.

Eşkerayîye de ame vatene ke Komplo şexsê Abdullah Ocalanî de vera kurdan amebi kerdene û komplo bi hêrişanê vera kurdan dewam keno. Ciwanan bale ante ser ke artêşa tirke ya îşxalkere vera gerîlayan Herêmanê Pawitişî yê Medya de çeka kîmyewîye şuxilnena. Eşkerayîye de venga pêro ciwanan ame dayene ke bi ruhê fedayî wayîrê Rayberê Şarê Kurdî, gerîlayan û têkoşînê azadîye vejîyê.