16ê hezîrane de 16 rojnamegerê kurdî Amed de ameybî tepiştene. Komeleya Rojnamegeran a Dîcle Firatî (DFG) û Platformê Rojnamegeranê Cinîyan ê Mezopotamya (MKG) Amed de seba hemmesleganê xo yê tepişteyan eşkerayîye daye. Eşkerayîye verê DFGyî de ameye dayene. Eşkerayîye de pankarta 'Çapemenîya azade nêna bêvengkerdene' ameye akerdene. Temsîlkarê xeylêk rêxistinan û merdimê sivîlî zî tewrê eşkerayîye bîyî.

Vervatoxa MKGPyî Roza Metîna vist vîrî ke tim vera rojnamegeranê kurdan bêhuqûqîye ameye kerdene û vat: ''Kesê ke sûcî kenê yenê xelatdayene, rojnamegerê ke xebera sûcî kenê yenê cezakerdene. Vera rojnamegeranê kurdan hêrişê sîstematîkî yenê kerdene. Wextê operasyonî de bînayê ma bi rojan gêrîyayî binê ablûqa û dest nîya malzemeyanê ma ser. Avûkatî zî nêzanenê ke se bîyê nê malzemeyan.''

Edîtorê Ajansê Mezopotamya (MA) Azad Altayî vat: ''Wazenê vengê rojnamegeran bibirnê. Eke biwazê vengê ma bibirnê wa bizanê ke ma do zêdeyêr vengê xo vejê. Heta ke embazê ma bêrê veradayene ma do bibê vengê înan.''

Eşkerayîye bi sloganê 'Çapemenîya azade bêveng nêbena' û bi çalakîya roniştişî qedîyaye.