Dadî û waya Mehmet Yildirimo ke hetê leşkeranê tirkan ra Licê de amebi qetilkerdene ANFyî rê qalê serebûtanê wextê operasyonî kerd.

Waya Mehmet Yildirimî Kudrete Çelîk ard ziwan ke operasyonî ra verê cû kamyonêke ameya verê dewe û leşkerî tira peya bîyê. Kurdrete vat: ''Leşkerî mîyanê dewe de vila bîyî. Şan bi, tarî bi. 15 deqayan ra dima vengê çekan ame. Guleyî erzîyayêne keyeyî. Sofî (Mehmet Yildirim) gêrayêne ke bizano çi qewimîyeno û ma bipawo. Dima ey xîret kerd ke peyê keyeyî ra vejîyo la bi hedefê fîşekan. Dima leşkeran dormeyê keyeyê ma girewt û guleyî eştî. Fîşekî kewtêne her cayê keyeyî ra. Ma awil fam nêkerd  ke Sofî şehîd bîyo. Ma xîret kerd ke xo biresnê ey. Heta ke ma keyeyî ra vejîyayî fam nêkerd ke se beno.

Ma vatêne qey Sofî birîndar bîyo û bi ê halî dewe ra vejîyayo. Wexto ke ma o mîyanê keyeyî de nêdî ma vat ke dewe ra vejîyayo. Nêmeyê şewe lajê min o ke Amed de waneno telefon kerd û rewşa Sofîyî pers kerd. Ma vat ke o dewe ra vejîyayo. La lajê mi vat 'Xalê mi şehîd bîyo.' Dima  ke leşkeran ro qetil kerdo dewe ra berdo. Heta serê sibayî leşkerî dewe ra nêvejîyayî. Ma nêzanayêne ke se bikerê. Ma do heta key nê zulmî bivînê? Bi serran o dewlete nê zulmî ma rê kena. Heta key no zulm do dewam bikero?''

Dadîya Mehmet Yildirimî Zeynepe pare kerd ke ganî çew verê nê zulmî de bêveng nêmano û vat: ''Lajê mi dima ke ame dewe di saetan ra dima leşkeran eşt dewe ser. Hema ma nêzanayêne ke lajê mi ameyo dewe. Dewlete çara eşnawit? Cîgerê mi vêşeno, ez çi vaja. Wa dewlete ma rê nêvaje 'kurdî way û birayê ma yê.' Ma wina nîyê. Ê ma kişenê.''