Keyeyê Demîro ke Şemrexê Mêrdînî ra semedê arêdayîşê findiqan şîyî Sakarya, vizêr uja raştê hêrişê nîjadperestî ameyî. Babî Hamdîn  Demîrî derheqê babete bi  nameyê keyeyê xo ANFyî rê qisey kerd.

Demîrî vat: ''17 karkerê ke semedê gurenayîşî şîyî hêga ûca  hetê wayîrê hêgayî ra raştê heqaratanê giranan ameyî û vera naya hêga ra vejîyayî û kar caverdayo. Wexto ke ê hêga ra ver bi cayêmendişî şîyênî rayîr de înan rê hêrişo plankerde yeno kerdene. Hêrişkaran  dewanê nizdîyan ra venga merdimanê xo zî dayo. Destê tayînan de nalçix û hacetê winayênî yê birnayîşî estbê. Yew ciwanê ma bi giranî birîndar bi. Bitaybetî domana ma ya ke dîmenan de yeno vînayene ke senî yena lapatkerdene, rewşa ci hem fîzîkî hem zî psîkolojîk xirab a.

Înanê ke waşt ke nêweşxane de rapor bigerê, hetê cendirmeyî ra ameyî vengdayene ke îfadeyê înan bêro girewtene. Avûkatanê ÎHDyî ma rê telefon kerd, siba do bêrê dewe. Ma do siba pêhesnayîşê sûcî bikerê. Ma xora waştenê ewro gerreyê hêrişkaran bikerê la domanê ma yê ke raştê hêrişî ameyî rewşa înan hol nîya. Coka ma peyde eşt.

Çiyo ke ma rê bi dişmenîya vera kurdan a.  Verî zî qewimîyayîşê winayênî bîyî. Têna vera kurdan nê hêrişî yenê kerdene. Şima heta ewro eşnawito vera tirkêk çîyêko winayên bîyo? Nê, nêbîyo. Nameyê naye nîjadperestîye ya. Sakarya de nameyê kampa komkerdişî yê  karkeranê serrewextî yê kurdan sey  'bazarê kutikan' nayo pa. Gerek hînî senî bêro îzahkerdene. Ne polîs ne zî leşkeran mudaxale kerdo. Êyê ma bi îmkananê xo xelisîyayî.''