Dêrsim de polîtîkayê şerê taybetî yenê kerdene, wextê ke serebûtê îstîsmarî, tacîz û tecawuz qewimîyenê, mercîyê edlî qerarê nimiteyî gênê û serebûtî nimnenê. Walîtîya Dêrsimî seba ke verê reaksîyonê şarî  bigêra hertim çalakî û bernameyan qedexe kena.

27ê teşrîna verêne ya 2020î de Huseyîn Polatî cinîyêke tacîz kerdbi. 15 endamanê Platformê Cinîyan ê Dêrsimî waşt vera tacîzî çalakîye bikerê la înan rê cezaya pereyî ya 3 hezar û 150 TL dîyaye. Derheqê înan de ‘qedexeyê çalakîye' zî cipersayîş dîya destpêkerdene. Hetê bînî ra zî wendekara Unîversîteya Munzurî Gulîstan Doku hema nêdîyaye. Reyna serebûtê 20ê Gulane de cinîya bi nameyê V.Y. raşta tedaya cendirmeyan ameye.

Endama Meclîsê Partîye yê HDPyî û Platformê Cinîyan ê Dêrsimî Helîne Yagmu Ucî serebûtê Dêrsimî ercnayî. 

Helîne eşkera kerd ke şaristan de vera cinîyan polîtîkayê şerî yenê kerdene û netîceya nînan de tecawuz, tacîz, îstîsmar û vînîkerdişî qewimîyenê. Hêlîne vat: ''Cinîyî keye de mêrdeyî ra teber de zî dewlete ra şîdet vînenê. Cinîyî vera şikdaranê şîdetî yenê cezakerdene. Dewlete 27ê teşrîna verêne de semedê çalakîye ceza daye ma la heman dewlete şikdaran û sûcdaran pawena. Rixmê nê astengîyan zî xora ma çalakîya xo kerde û şikdar teşhîr kerd. Çalakîyê semedê Gulîstane Doku zî yenê astengkerdene.'' 

Helîne da zanayene ke dewlete pê cezaya pereyî cinîyan ra sermaye awan kena û vat: ''Dewlete cinîyan kena feqîr, vêşan verdena. Pandemî kena bahane û ma kena binê tedayan. Rixmê nê çîyan zî dewlete do nêeşka verê têkoşînê cinîyan bigêra. Ma do seba Gulîstane Doku û cinîyan ê bînan tim têkoşîn bikerê.''