Dêrsim de karkerê ke badê qeyûmê şaredarîye karî ra ameyî vetene, badê xoverdayîşê 160 rojan seba ke Merkezê Pêroyî yê DÎSKî paştî ci nêdayo nêrazîbîyayîş mojna ra.

Karkeran semedê tewrbîyayîşê rayraşîyayîşê ke do 16ê hezîrane de saetê 18:30 de Kuçeyê Sanatî ra ver bi Meydanê Seyîd Rizayî bêro kerdene, veng da DÎSK û şarî. 

Eşkerayîye de ame vatene ke DÎSK wayîrê mîrasê Xoverdayîşê Girdî yê Karkeran yê 15-16ê hezîrane nêvîyayo. Karkeran vat: “Ma semedê bi rûhê 15-16ê hezîrane têhetameyîşî veng danê DÎSKî. Ma sey karkeran ke Şaredarîya Dêrsimî ra ameyî eştene ma do 16ê hezîrane de rayraşîyayîş bikerê. Ma veng danê şarê xo ke wa tewrê ci bibo.”