Dewanê Danzî û Kurukaymakî û deweka Koçerî yê qezaya Xozatî ya Dêrsimî de 17ê tebaxe de netîceya operasyonê leşkerî de şewatî dest pêkerdbi. Dewlete şewatî rê mudaxele nêkena, şewat roja 11. de vera vila beno.

Şarê herême wazeno şewatî hewna bikero la leşkerî nêverdenê. Şewat vizêr dewa Uzunçeşme ra zî vila bi. Şewat de bi desan hektar warê daristanî vêşa. Şewat ewro resa dewa Karperî ya Pulurî.

Dîya zanayene ke vizêr şaro ke waşt şiro warê şewatî hetê Qereqolê Cendirmeyan ê Bîlgîçî ra ame astenekerdene û  hetê Qeymaqemê Pulurî ra pê vatişê ''agêrê, semedê şima hole nêbeno'' ame tehdîtkerdene. Şaredarê Dêrsimî Fatîh Mehmet Maçoglu û yew grûba rojnamegeran heta yew nûqtaya dûre ya dewa Karperî ya ke şewat resayo ci şîyî. Yeno vînayene ke herême ser o duman bîyo berz. Maçogluyî vat şewatî rê mudaxale nîno kerdene.