Operasyonê leşkerî de dewanê Danzî, Kurukaymak û Koçerî yê qezaya Xozatî yê Dêrsimî de 11 rojî yo şewat qewimîyeno. Şewat vizêr dewa Uzunçeşme ra zî vila bi. Şewat de bi desan hektar warê daristanî vêşa. Şarê herême wazeno şewat hewna bikero la leşkerî nêverdenê.

Walîtîya Dêrsimî pê eşkerayîyêke îdîa kerd ke semedo ke ê nêeşkenê xo biresnê warê şewatî, nêeşkenê şewatî hewna bikerê.

Wekîlê HDPyî yê Dêrsimî Alîcan Onluyî derheqê şewatê Xozatî de eşkerayîyêke daye. Onluyî eşkerayîye de pare kerd ke semed o ke ci rê mudaxeke nêame kerdene şewatê Xozatî vilayê Pulurî bîyo û herêma dewa Halîtpinar, Tokmak Baba û Dereyê Emîrxanî de şewatêko bîn ame vetene.

Onluyî bale ante ser ke şewatê Dêrsimî sey şewatanê şaristananê Tirkîya nêbi rojdem û vat: ''Key babete cografyaya Kurdîstanî bena rayaumûmîye bena bêveng. Şarê Dêrsimî têna meverde. Dêrsim de dewlete bi xo daristanan vêşnena û nêverdena şewatî rê mudaxele bêro kerdene. Rojawanê Tirkîya de şewatê daristanan yenê qeydkerdene la şewatê Dêrsimî nênê qeydkerdene.

Ma hol zananê ke mesuldarê şewatanê Kurdîstanî îqtîdar û hemkarê ci yê. Wa nê mesuldarî bêrê muhakemekerdene.

Ma sere de Platformê Wa Munzur Azad Bihêriko venga rayaumûmîya Dêrsimî, dezgehanê sivîlan, sendîkayan û dezgehanê bawerîyan danê ke vera nê şewatî têbigêrê û daristananê Dêrsimî bipawê. Ma pîya vera nê polîtîkayanê qirkerdişê xoza vejîyê. Ma vera ê kesanê ke hêrişê xoza, bawerî, kultur û ziwanê ma kenê têkişt û mil bi mil vinderê.''