Merkezê Îrtîbatî û Çapemenîye yê HPGyî derheqê hêrişanê îşxalî de eşkerayîyêka nuştekîye daye. Eşkerayîya HPGyî de nê detayî dîyayî:

''22ê gulane de qezaya Pulurî ya Dêrsimî Kuleyê Gayret Babayî de wesayîtê kontrayan hetê hêzanê ma ra mesafeyêka nêzdî ra ame pirodayene. Netîceya na çalakîya serkewte de 2 kontrayî ameyî cezakerdene û wesayîtê kontrayan ame derbkerdene.

Egîdanê Botanî çarçewa Hemleya Serfîrazîye de;

8ê êlule de herêma Koyê Herekolî yê qezaya Perwarî yê Sêrtî de warê Şehîd Berxwedanî de wexto ke yewinêka nimite ya artêşa tirke ya îşxalkere dafike ronayêne hetê hêzanê ma ra gêrîyaye binê kontrolî. Dima na yewine pê taktîkê mîyandekewtişî mesafeya nêzdî ra ameye pirodayene. Netîceya na çalakîye de tewr tay 1 îşxalker ame cezakerdene, 1 îşxalker zî birîndar bi.

Çarçewa Hemleya Şorişgêre ya Bazanê Zagrosî de herêma Zapî de;

11ê êlule de îşxalkerê ke waştêne Cîloyê Biçûkî de mewzî binê pê çekanê giranan ameyî hedefkerdene. Na çalakîya hêzanê ma ra dima îşxalkeran xebata mewzîyan vindarnaye.

Warê Xoverdayîşê Girê Sorî yê Avaşînî de;

Artêşa tirke ya îşxalkera ke pê îradeyê Apogîrî yê gerîlayan nêeşkaye reyna metodê gemarinî yê şerî vistî dewre. 28ê tebaxe de artêşa îşxalkere sûcê şerî kerd, netîceya gazanê înan ê kîmyewîyan de Warê Xoverdayîşê Girê Sorî de embazêkê ma şehîd bi. Nasnameyê embazê ma yê şehîdî dima rayaumûmî û şarê ma reyde bêro parekerdene.

Warê Xoverdayîşê Werxelê yê Avaşînî de;

9ê êlule de artêşa tirke ya îşxalkere Warê Xoverdayîşê Werxelê 8 reyî pê teqaberan û gazanê jehrînan da bombayan ver. Bombardumanî ra dima mabênê îşxalkeranê ke waştêne debikewê war û xoverdayoxanê Werxelê de pêkewtişê giranî qewimîyayî. Netîceya xoverdayîşê bi ruhê Apogîrî yê embazanê ma de îşxalkerî nêeşkayî aver şorê.

Artêşa tirke ya îşxalkera ke Warê Xoverdayîşî bi giranî dayî bombayan ver 10ê êlule de reyna sucê şerî kerd û gazê kîmyewî xebitnayî. A roje 4 reyî Warê Xoverdayîşî pê teqaberan dîya bombayan ver û 11ê êlule de serê sibayî reyna gazê kîmyewî şuxilîyayî.

9ê êlule û 10ê êlule de xeta Qaşûra ya Metîna de têgêrayîşê helîkopteran qewimîya, dewa Şîyê ya qezaya Dînartê ya Akrê, dormeyê dewanê Êdinê, Dêşîşê û Serarû yê Kanî Masî û warê Kela Qumrîyê û Koordîne dîyayî bombayan ver. 10ê êlule de waranê Merwanos, Tabura Ereban, Girê Sipî, Girê Sor û Girê Silêmanî de têgêrayîşê helîkopteran qewimîya û kendalê Girê Qertalî, Girê Lanetî, Gelîya Basya û Girê Şehîd Întîkamî dîyayî bombayan ver.''