Vera xespkerdişê Şaredarîya Dêrsimî nêrazîbîyayîşî dewam kenê. Endamanê Komeleyanê Elewîyanê Demokratîkan (DAD) û Kongreya Îslamê Demokratîkî Dêrsim de rayraşîyayîş kerd.

Endamê DAD û DÎKî, Wekîla DEM Partî ya Dêrsimî Aytene Kordu,Wekîlê DEM Partî yê Îstanbulî Celal Firat, Hemşaredarê Dêrsimî Cevdet Konako ke wezîfeyê ci ame xespkerdene, pabesteyê Îtîfaqê Dêrsimî û hemwelatîyî verê Sûka Binerdî de ameyî têhet û vera bi şaredarîye rayra şîyî.

Çalakîye de pankartê ''Eke gan ganî ra razîî bo heq zî tira beno razî. Ma şima ra razî nîyê, heq zî mela şima ra razî mebo. Qeyûman rê ney'' ame akerdene.

Eşkerayîye hetê endama DÎKî Hatice Şeker ra ameye dayene. Eşkerayîye ra qisemêk wina yo: ''Kurd vîjeno la îdare nêkeno. Kurd raya xo şuxulneno la AKP-MHP dest nano îradeyê ci ser. Hemşaredarî bi rayanê şarî ameyî vîjnayene û sîyasetmedarê meşrû yê. Qeyûmî meşrû nîyê. Ganî qeyûmî peyser bîancîyê û îradeyê şarî rê hurmet bêro kerdene.''

Wekîlê DEM Partî yê Îstanbulî Celal Firat zî vat: ''Ganî Tirkîya de pêro şar û bawerîye bibê yew û vera xespkerdişê îradeyî xover bidê. Vera îdayê şarî bêhurmetîye yena kerdene. Ganî ma nê ra vajê bes o.''

Hemsereka DADî Kadrîye Dogan zî ard ziwan ke îradeyê şarî bi barîyeran ameyo qefilnayene û vat: ''Çîyo ke şima kenê cayê ci ne din de ne wijdan de ne zî merdimîye de est o. Sibayî do bibê yê kesanê wayîrê wîjdan ê û yê xoverdayoxan.''