Hemsereka Komeleya Rojnamegeran a Dîcle-Firatî (DFG) Dîcle Muftuoglu hêrişê vera xebatkaranê çapemenîya azade ANFyî rê ercnayî.

Dîcle îfade kerd ke AKP-MHPyî weçînayîşan de derbêka pîle werda û vat: ''Îqtîdarî vera kurdan şerêko newe plan kerd, Bexdad û Hewlêr de pêvînayîşî kerdî û dima dest pê hêrişanê vera çapemenîye kerd. Operasyonê Belçîka operasyonanê Anqara û Îstanbulî ra cîya nîyo. Seba ke çapemenîya kurdan raştîyan resnena şarî vera ci operasyonî yenê kerdene. 2022 ra nata tewr tay 35 embazê ma tepişîyayî. Bi taybetî 8ê hezîrane ra dima, operasyonê leşkerî reyde vera çapemenîye operasyonî ameyî kerdene. La bi nê operasyonan îqtîdar nêeşkeno ma bêveng bikero. Pêro prosesanê tarîxîyan de îqtîdarî heman operasyonî kerdî. Nê operasyonî plankerde yê. Ma zanenê ke îqtîdar key teng bibo verê xo dano ma.''

Dîcle ard ziwan ke îqtîdarê AKP-MHPyî mîyanê amadekarîya şerêkê neweyî de yo, seba ke zerarê nê şerî binimno tedaya vera çapemenîya azade zêdînaya. Dîcle vat: ''Aya ke asta şerî ya raştikêne resnena şarî çapemenîya azad a. Coka xîret kenê ke ma bêveng bikerê. Xîret yeno kerdene ke rojnamegerê ke terefgîrê AKPyî nîyê rojnamegerîye ra bêrê dûrîvistene. Seba ney qanûnî zî ameyî amadekerdene. Çapemenîye rê bultenê ke îqtîdarî amade kerdê yenê ferzkerdene. Çapemenîya azade vera ney vejîyena coka vera ci hêriş yeno kerdene. ''

Dîcle pare kerd ke rixmê teda, hêriş û tepiştişan zî ê do cigêrayîşê raştîye ra fek vera nêdê û vat: ''Ma rojnameger ê û raştîyan resnenê şarî. Rojnamegerîye sûcêk nîya. Sey çapemenîya azade 30 serrî yo ma kenê ke mîsyonê xo bîyarê ca. Ma neçare yê ke raştîyanê meseleya kurdan binusê.''