HPGyî dîmenê cenazaya endamê hêzayê taybetan ê artêşa tirke Nacî Kaygisizo ke mergê ci sey sirî nimîyeno weşanayî.

Merkezê Îrtîbatî û Çapemenîye yê HPGyî 10ê temmuza 2022yî de bi eşkerayîyêke dabi zanayene ke cenazaya Kaygisizî înan destî de ya.

Eşkerayîye de wina amebi vatene:

''Ame qetîkerdene ke no leşkero ke 7ê temmuze de merdo û cenazaya ci destê hêzanê ma de ya, nameyê ey Nacî Kaygisizî yo. Eşkera bi ke no leşker pabesteyê hêzanê taybetan ê artêşa tirke yo û mergê ci rayaumûmîye ra yeno nimitene. Seke ma verî zî rayaumûmîye rê dîyar kerdbi ê kesê ke nê leşkeran şawenê seferê îşxalî yê vera Kurdîstanî wayîrê cenazayanê leşkeran nêvejîyenê. Coka ma venga keyeyê leşkerê bi nameyê Nacî Kaygisizî danê ke eke keye biwazo ma eşkenê bi rayîrê sivîlan cenazayê domanê ci bişawê ci. Keyeyê leşkerî eşkeno bêro qezaya Amedîyê ya şaristanê Dihokî ya Başûrê Kurdîstanî û tîya de bi rayîrê sivîlan ma de têkilîye virazo.''

Rixmê eşkerayîyanê HPGyî zî dewleta tirke mergê Kaygisizî nimnena. Keyeyê Kaygisizî zî hema muracatê HPGyî nêkerd. Goreyê texmînan tedaya dewleta tirke ra medya nêwazena na babete bîyara rojdem.

Gerîlayanê ke dest nayo cenazaya Kaygisizî ser, derheqê leşkerê tirkî de agahîyê neweyî dayî. Gerîlayan 9ê temmuze de verê kamera de wina vat: ''No leşker û leşkerêko bîn hetê hêzanê ma ra ameyî cezakerdene. Nameyê ci Nacî Kaygisiz o. Serê kaskê ci de nameyê ci nusîyeno. Serê ci de nasnameyêk yan zî kunye çin bi. Serê ci de têna yew telefon vejîya.''

Endamê Komîteya Rayberdişî ya PKKyî Murat Karayilanî roportajê xo yê ANFyî de derheqê babete de wina vatbi: ''Dewleta tirke nê şerî de 500 ra zêdeyêr kişteyî dayî la ancax 30-40 kişteyê xo eşkera kerdî. No îqtîdar kiştox o. Vano 'ameyoxê ma Beka de yo.' Çi karê dewleta tirke Başûr de est o? Şarê Tirkîya vêşan o la îqtîdarê AKP-MHPyî pê şovenîzmî çimanê şarî besteno. Dewleta tirke heta nika reya verêne hende kişteyan dana. Destê înan de gonîya ciwananê kurdan û tirkan est a. Dewlete cenazayanê xo dana bombayan ver. Dewlete verî tedbîr girewto; belgeyan pê keyeyanê leşkeran dana îmzakerdene ke wa mergê leşkeran eşkera nêbo. Nika cenazayêke destê embazanê ma de ya. La dewlete nê leşkerî ser o vana 'nêweşxane de merdo.' La cenazaya ci koyan de ya. Yanî dewlete her çi pê zûran îdare kena.''