Vakurê Kurdîstanî de têgêrayîşê leşker û polîsan ê tirkan tewr zaf tesîrê domanan kenê. Psîkolog Şîyar Guldîkenî derheqê babete de ANFyî rê qisey kerd.

Guldîkenî îfade kerd ke Kurdîstan de polîs û leşkerî sey hacetê tersnayîşê domanan ê û vat: ''Pîlî wexto ke çimanê domanan tersnenê vanê 'Ez veng dana polîsan.' No kerdiş hem domanan hem zî komelî rê tesîr keno. Domanî bi nê hawayî înan ra tersenê. Hetê bînî ra domanî wexto ke şinê şaristananê Tirkîya polîs û leşkeran nêvînenê la şaristananê Kurdîstanî de tim mîyanê polîs û leşkeran de yê. Coka no zî zaf tesîrê domanan keno.

Domanî weşî û xirabîye pîlan ra musenê. Domanî vînenê ke keyeyanê înan rê çi yeno kerdene coka semedê ameyoxî qerqilîyenê. Ziwanê sîyasetî, ziwanêkê gefî yo. Wexto ke sere de Serekkomar selahîyetdarî wina qisey kenê domanî binê tesîrê ci de manenê. Eke pîlî wina têbigêrê xora domanî zî wina pê nefretî de benê. ''

Guldîkenî bala ante hacetanê kayî yê domanan ser û vat: ''Welatê îşxalkerî îşxalî ra verî pê hacetanê kayî domanan asîmîle kenê. Biewnê kafeyanê înternetî de domanî tim pê kayanê şerî kay kenê. Verî rewşa şerî kenê normalîze. Dima zî dest pê şerê raştikênî kenê. Coka heta ke ê pîlî şîdet û xirabîye ra fek vera nêdê domanî zî tira fek vera nêdanê.''