Xeylê keyeyî bi berardişê tutinî debarê keyeyê xo kenê. Qezaya Farqînî ya Amedî de cinîyî karê tutinî reyde eleqedar benê. Edîbe Eze zî 2 serrî yo pê berardişê tutinî debarê keyeyê xo kena.

Edîbe, qiseykerdişê xo de bale ante kar û barê xo ser û vat: "Ma bezreyê tutinî erzenê û bende manenê ke heta şitlan bigîro. Dimayo ke şitlê ci pîl benê seba arêdayîşî amade benê. Ma nê şitlê ke pîl bîyê tira kenê û benê hewşeyê keyeyê xo û bi nê hawayî dest pê karî kenê. Nika ma nê pelê tutinî derbazê laye kenê û dîrekan de daliqnenê. Dima ra nê tutinê daliqnayeyî binê tîje de verdenê ke zer bibê. Wexto ke wişk bî, ma înan hewênenê û kenê zere. Zimistanan zî nê tutinî êdî nerm benê. Dima ke nerm bî ma înan kenê destik û hînî roşenê. ”

Edîbe ard ziwan ke no karêko zaf zehmet o û wina vat: “Nê karî de keda cinîyan zaf zêde ya. Ma debarê xo bi nê karî kenê. 2 serrî yo ez nê karî kena. Pel bi pel destê ma ra derbaz beno. Ma serê sibayî dest pêkenê heta şanî dewam kenê.”