Roşnvîr û sîyasetmedar Elî Kerîmîyî roşnvîrê ke vera îşxalê dewleta tirke bêveng manenê bi hawayêkê tûjî rexne kerdî û vat: ''Ganî roşnvîrê kurdan paştî bidê yewbînan, rayîr nêdê îqtîdarê Barzanîyî û îşxalkeran.''
Roşnvîr û sîyasetmedar Elî Kerîmîyî derheqê hêrişanê dewleta tirke, rewirê PDK û ê roşnvîran de servîsê sorankî yê ANFyî reyde qisey kerd.
Kerîmîyî îfade kerd ke roşnvîrê kurdî vera îşxalî bêveng ê û vat: ''Ewro bi taybetî Başûrê Kurdîstanî de roşnvîrê kurdî zaf qels ê. Ewro ma vînenê ke roşnvîrê kurdî Barzanî û îqtîdarê PDKyî reyde têgêrenê. Roşnvîrê kurdî bêveng ê. Ganî roşnvîrê kurdî paştî bidê yewbînan, vengê xo berz bikerê û rayîr nêdê îqtîdarê Barzanîyî û îşxalkeran.''
Kerîmîyî ard ziwan ke PDK xo sey parçeyêkê Osmanijan vîneno û vat: ''Barzanîyî wextê referandumî de venga dinya û Iraqî dabi û vatbi 'ma îşxalê welatê xo qebul nêkenê.' La ewro vera îşxalî sereyê xo ard war. Serra 1992î de hende dejê Enfal û Heleçeyî ra dima Parlamentoya Başûrî hetê PDKyî ra bi paştdayîşê rejîmê Baasî ame îşxalkerdene, hêzê YNKyî surgunê sînorî bîyî. Nê kerdişan ra ê mesuldar ê. Na bêrûmetî nîya? Ganî ewro roşnvîr û çapemenîye naye qebul bikerê. Senî eşkenê vajê ke ê pê PDK û Barzanîyî sereberz ê?''
