Şoreş* sey nameyê xo yewo şoreş bi. Ey her hela cuya xo de cewherê şorişgêrîye weye kerd. Ey vindertiş sey îxanetê vera şarî qebul kerdêne. O tim tewr verî de bi. Şoreşî destpêkê ciwanîya xo de verê do da waranê azadîye. O bi gerîlayêko çêr dima zî bi fermandar û heskerdoxê erd û azadîye.

Ey zanayêne ke bêxeyalî merdim nêeşkeno biciwîyo. Ey emrê xo da ameyoxêkê demokratîkî û welatê azadî.

Hîkayeya ci ya gerîlatîye Dêrsim de dest pêkerde û resaye her cayê Başûrê Kurdîstanî dima reyna agêraye Dêrsimî. O resa Dengizê Reşî zî. Safhaya diyîne ya cuya gerîlatîye de o beşdarê têkoşînê şorişî yê Rojawanî bi. Pê destpêkerdişê hêrişanê DAÎŞî ey zî cade verê xo da waranê şer û têkoşînî.

Ey vera DAÎŞî bi serrab şer kerd û rûmetê merdimîye pawit. Teqayîşêkî ra dima rojêke o xo ra şi. Ame vatene ke şehîd bîyo labelê ey îradeyê xo yo şorişgêr mojna û têkoşînî rê dewam kerd. Çimê xo vînî kerd, parçeyê şarapnelî bedenê ci de vila bîyî. Çim û bedenê ci roje bi roje bîyêne weş. La ey zî zanayêne ke hînî do sey verî nêbo. Bêsebir pawit ke abigêro waranê têkoşînî.

Dima ke ci rê ame vatene ke tedawî şert a şarê Îtalya û embazanê kurdan ci rê verara xo akerde. O mîyanê şarê Îtalya de bi zerrîyêka rehete tedawî bi. Hema o çax eqlê ci sey her wextî koyan de bi. Waştêne cade abigêro. Çimo kêm nêeşkayêne ci rê bibo asteng.

Rojêka payîzî pa şeş embazanê xo kewt rayîr. Rayîr de wina fikirîyayêne ke ganî xo faşîzmê dewleta tirke ra bipawo. Texmîn nêkerdêne ke rayîr de do çita bêro sereyê înan ser. Goreyê înan eke ê raştê pêşmergeyan bêrê pêşmergeyî do înan hîşyar bikerê. PDKyî wextêkî ra nata hemkarîya bi dewleta tirke xorin kerdêne. PDKyî dafike ronabî û pabeyê gerîlayan bi.

Dafika xayîne û ajane de ey dinyaya xo bedilnaye. Gerîlayê birîndarî zî hetê PDKyî ra ameyî înfazkerdene û PDKyî faşîzmê tirkî û DAÎŞî rê vat 'Ma zî sey şima yê.' Serrê tewr rindî yê cuya înan hetê dafike ra ameyî diznayene. Ne ey ne zî embazanê xi peynîyêka winasêne texmîn nêkerdêne.

Şoreşî coş û kelecanê xo berdî her cayî. O pê qerardarî wayîrê cuye, şoriş û şorişgêrîue vejîya. Ey peyê xo de hêvîyêka pîle verdaye. Wezîfe û mesuldarîya ma ya ke ma do rayîrê ey ra bi eşq û azadîye şorê.

* Şoreşa Mardîn (Hakîm Acar) şewa 28-29ê etbaxxe de pa 6 embazanê xo wexto ke Qendîlî ra derbazê Behdînanî bîyêne Xelîfan de hêrişê hêzzanê PDKyî de şehîd bîyî. No nuşte hetê embazanê ci yê koyanê Dêrsimî ra nusîya.