Mayanê Haştîye Adalete Safali û Perîşane Akçelîk wexto ke seba îfade bidê dozgerîye 22yê tebaxe de Geverî ra şîyêne Colemêrgî rayîr de qezayê trafîkî de dinyaya xo bedilnabî. Qeza de domanê dayîke Perîşane Cîhan Akçelîkî zî dinyaya xo bedilnaye.

Wextê qedexeyê tebervejîyayîşî yê 2015î de di lajê Perîşane Akçelîk dinyaya xo bedilnabî. Maya Haştîye Perîşane Akçelîka ke Colemêrg de sey 'Dayîke Sîsine' şinasîyayêne, dima ke kekê ey serranê 90an de tewrê gerîlayan bi, bi aktîfî mîyanê têkoşînê azadîye de cagirewt. Dayîke Perîşane dadîya 5 kênayan û 2 lajan bîye. Kênaya aye Evîne Akçelîk (Nûda Gever) 2008 de, lajê ci Kajîn Akçelîk (Baz Mordem) 2013 de tewrê gerîlayan bîyî. Evîne Gever de, Kajîn zî Nisêbîn de şehîd bîyî. Dayîke Perîşane netîceya têkoşînêkê xurtî de eşkeye cenazaya kênaya xo bigêra. Aye merasîmê cenaza de wina vatbi: ''Mi rê derd bi ke Evîne ameya qetilkerdene û bedenê ci ameyo parçekerdene. Ez qayîl nîya ke no têkoşîn nêmcet bimano.''

Dayîke Perîşane cenazaya lajê xo zî Mêrdînî ra girewte û Gever de kişta kênaya xo de defin kerd. Babî Saîd Akçelîk şehadetanê domananê xo ra dima pê kanserî kewt û 2021 de dinyaya xo bedilnaye. Dayîke Perîşane mêrdeyê xo zî kişta laj û kênaya xo de zî defin kerd. Dima cenazayê aye û lajê ci Cîhan Akçelîkî zî kişta nînan de ameyî definkerdene.

Husrete Akçelîk pare kerd ke xala ci Perîşane şehadetanê domananê xo ra dima emrê xo nayo têkoşînê azadîye ser. Husrete Akçelîk vat: ''Xala mi ra her kesî zaf hes kerdêne. Dewlete aye rê zaf teda kerdêne. Ma tim ci rê vatêne ke wa şora teberê welatî. La aye vatêne ke 'ez do welat û têkoşînî war nêverdena.' Aye armanc kerdêne ke wa haştîye bêra. Xala mi emrê xo na nê rayîrî û nê rayîrî de merde. Sey merdimanê ci ma do têkoşînê aye rê dewam bikerê.''

Merdima Perîşane Akçelîk û Maya Haştîye Amîna Angudar vat: ''Aye di ewladê xo dayê têkoşînê azadîye. Wextê qedexeyê tebervejîyayîşî de keyeyê aye amebi vêşnayene. Rixmê ney zî aye newe ra keyeyê xo viraşt. A heta peynîya emrê xo binê teda de bîye la qetî apey gamêke nêeşte, xo ver da.''

Hemsereka HDPyî ya Geverî Halîme Suer vat: ''Pêro xebatan de ma pîya bîyî. Dayîke Perîşane dayîkêka kedkare bîye. Ez aye ser o çi vaja kêm maneno. Ma do qetî mîrasê aye war de nêverdê. Şarê Geverî do têkoşîn û keda dayîke Perîşane xo vîr a nêkero.''