Qezaya Farqînî ya Amedî de HDP çarçewa Kampanyaya 'Ma HDP yê, her ca de yê' şarî reyde kom bi. Serekwekîla Koma HDPyî Merale Daniş Beştaş, Vervatoxa Meclîsê Cinîyan Ayşe Acar Başaran, Heyetê Rayberdişî yê Merkezî, endamê Meclîsê Partî û xeylêk merdimî tewrê bernameyî bîyî.

Heyet pê konvoyêk û pêşwazîkerdişê şarî kewt şaristan. Polîsan pê bahaneya bernameyê HDPyî yê Êlihî xîret kerd ke verê HDPyî bigêrê la ablûqaya polîsan ameye şiknayene. Polîsan Farqîn de zîyaretê esnafan ê HDPyî asteng kerd. Wekîle Merale Daniş Beştaş îfade kerd ke kes nêeşkeno xebata înan asteng bikero.

Verê bînaya HDpyî de Hemserekê HDPyî yê Amedî Zeyyat Ceylanî qisey kerd. Ceylanî vat: ''Ewro şarê Farqînî mojna ke çew nêeşkeno têkoşînê ma asteng bikero.''
Dima Hetkarê Hemserekanê HDPyî Omer Onenî qisey kerd û vat: ''Ganî tecrîdo giran ê vera Serekê PKKyî Abdullah Ocalanî bêro wedaritene. Coka ganî ma vengê xo berz bikerê.''

Merale Daniş Beştaş zî vera tecrîdî nêrazîbîyayîşê xo mojna û vat: ''Nika zîndanan de grevê vêşanîye estê. Ganî ma zî vengê nê grevî berz bikerê û bidê eşnawitene. Ganî tecrîd cade bêro wedaritene.''

Ayşe Acar Başaran vat: ''Ganî ma polîtîkaya tecrîdî pûç bikerê. Eke ma yewîya xo virazê qet yew hêz nêeşkeno ma vindarno.''