Heyetêko mîyannteweyî çarçeweya kampanyaya Ez wazenê Abdullah Ocalanî zîyaret bikerî ame tirkîya. Temsîlkaro mîyanneteweyî yê Konfederasyonê Karkeran COBASî ke bajarê Palermo yê Îtalya de falîyet rayra beno, Renato Franzîtta zî heyet de ca girewt.

Renato Franzîttayê ke ANFyî rê qisey kerd, ''vat têna modelê konfederalîzmê demokratîkî yê Birêz Ocalanî vera kapîtalîzmî çare yo.''

Renato Franzîttayî ard ziwan ke wextê komployê mîyanneteweyîyî de seba ke hukmatê Îtalya nêverda Rayberê Şarê Kurdî Abdullah Ocalan Îtalya de bimano no semedê înan îxanet o û nê vatî: ''Çunke gerek Wezîrê Edaletî yê dewrî statu bidayêne Ocalanî la no nêkerd. Vera nê îxanetî û bêrumetîye, bi têkoşînî  2015 de Palermo û Orlando de ma hemwelatîya fahrî dayê Birêz Ocalanî.''

Franzîttayî îfade kerd ke o zaf binê tesîrê fîkran û paradîgmaya Rayber Apoyî de mendo û nê vatî: ''Fîkrîyatê konfedarlîzmê demokratîkî yê Birêz Ocalanî, vera krîzê kapîtalîstî yo ke çend şino xorî beno, tek çare yo. Nê hetî ra goreyê mi têna modelê konfedarlîzmê demokratîkî pêro dinya de semedê pratîk de çarekerdişê meseleyan çare yo.''

Renato Franzîttayî ''Vengdayîşê Haştîye û Komelê Demokratîkî'' yê Rayber Apoyî semedê Rojhelatê Mîyanênî sey şansêkê girdî name kerd û nê vatî: ''Senî ke ma Şorişê Rojawan de zî dî, modelo ke bi fîkranê Birêz Ocalanî ame pêardene bitaybetî Rojhelatê Mîyanênî de vera grûbanê radîkalan ê cîhatkaran û sîyonîstan şansêk o. Nê hetî ra Şorişê Rojawanî semedê pîyaciwîyayîşê şaran modelo muhîm o. Tîya seba ke şarê cîya cîyayî cuyeya hempare înşa kenê no çareserî afirneno.''

Renato Franzîttayî qiseykerdişê xo wina qedîna: ''Ma vînenê ke nê prosesî de têna hetê kurdan kede dano. Hukmatê Tirkîya hema gama zelale nêeşta. Eke ma raşta zî wazenê qala prosesê haştîye bikerê, gerek sere de Abdullah Ocalan û Selahattîn Demîrtaş, Fîgene Yuksekdag pêro tepişteyê sîyasîyî serbest bêrê veradayene.''