Pêvînayîşê ENKS-PYNKyî dewam kenê. Rewşa winayêne de paştgêranê ENKSyî ra PDK sînorê Rojawanî de mewzî û qereqolan virazeno û tîya çekan ca keno. No zî şikanê derheqê nîyet û netîceyanê pêvînayîşî zafêr kenê.
Proseso ke tecrîdê vera Rayberê Şarê Kurdî Abdullah Ocalanî xori bi, hêrişê îşxalî yê dewalata tirke yê vera Başûr û Rojawanê Kurdîstanî zêdîyayî de aşma nîsane de Rojawan de Pêvînayîşê PYD-ENKSyî dest pêkerd. Dima ke 25ê gulane de 25 partî û rêxisitanê kurdan pîya Partîyê Yewîya Neteweyîye ya Kurdan (PYNK) na ro, pêvînayîşanê PYNK-ENKSyî dewam kerd.
Çar perçeyanê Kurdîstanî de kurdê ke yewîya neteweyîye wazenê ENKS û tay aktoranê ci ra şikdar bî zî bi fikîryayîşê 'beno ke no gameka yewîya neteweyîye be,' 'beno ke vergirewtişê hêrişanê vera Rojawanî rê hetkarîye bikero' paştî da ci. Tekîlîyê ENKSyî yê Tirkîya û PDKyî û sînorê Rojawan de viraştişê newe qereqolan û dormegiretişan şikanê semedê nê pêvînayîşan zafêr kenê.
Pêvînayîşê îtîfaqî yê ENKS-PYNKyî yê ke 3ê tebaxe de merhaleya ci ya 2. dest pêkerde dewam kenê.19ê êlule de endamê Konseya Hemserekîye yê PYDyî Aldar Xelîlî Ronahî TV de derheqê pêvînayîşî de qisey kerd. Xelîlî ard ziwan pêvînayîşî de derheqê îdareyî de tay munaqeşeyan dest pê kerd û vat: ''ENKS wazeno ke verê weçînayîşî Îdareyê Xoserî yê Rojawanî de ca bigero la hema na babete pêkerdişêk nêbîyo. No îdare bi îradeyê şarî vejîya werte. Ma sey hetê kurdî nêeşkenê naye nêvînayîşî ra bêrê. Xora no îdare têna herêmanê kurdan nê herêma ke hîra ya. Hemparê ma ereb û sûryanî estê. Coka no karê partîyêke nîyo. Eke wina bîyêne seba ke 'îtîfaq bibo û geme bierzîyo' tay fedakarîyê ameyêne kerdene. La semedê îdareyî sîstemêko ronişte esto. Hemparî estî. Ma têna nêeşkenê qerarê naye bide.''
ENKS bi serran o seba ke netewa demokratîke esas gêno PYDyî sûcdar keno. La bi xo xeta Tirkîya, PDK, Amerîka, Ewropa û Moskova de îtîfaqê leyminî yê her tewirî kerdî. Îşxalkerdişê Efrînî de bi hemparê Tirkîya. Reyna serekê ENKSyî Suud Mele yo ke tim bi ziwanê PDKyî qisey keno û vano 'Kurdê ke Rojawanî ra nîyê wa Rojawanî ra vejê' ê zî nê demî de çapemenîya PDKyî rê qisey kerd û bi vatişanê xeletan vat 'Pêvînayîşî giran şinê, PKK astengîye vejeno.'
Reyna endamê ENKSyî yo ke pabesteyê Mensur Barzanî û îstîxbaratê PDKyî yo MSDyî semedê pêkerdişê Partîya Îradeyê Şarî sûcdar kerd. Nê eşkerayîyî heme semedê zextê vera PYNKyî, xapînayîşê şarî, çîmkewtişê Amerîka ameyî kerdene. Netîceyê pêvînayîşî ramojnenê ke PYNK fedakarîya pîle kena la ENKSyo ke semedê şoriş, şar û sîstemê Rojanî çîyêk nêkerdo, herinda averberdişê îtîfaqê kurdan de kayanê masa kay keno waştişê ci yo esas parkerdişê îqtîdarî yo.
Seba ke paştkerê ENKSyî PDK hêrişê vera Kurdîstanî û Têgêrayîşê Azadîye yê Kurdîstanî de paştî dano Tirkîya, şarê Rojawanî zî qerqilîyeno û vano ke ganî wina senî bingeyê yewîya neteweyîye bêro eştene. Vera qiseykerdişanê Serekê ENKSyî Suud Melle yê vera PKKyî zî şar nêrazîbîyayîş ramojneno. Reyna 2016-2017 de wexto ke dibistananê Rojawan de perwerdeyê ziwanê dayîke dest pêkerd. ENKSyî pîya bi kîtleyê xo no protesto kerd bi. Şarê Rojawanî no zî xo vîrî ra nêkerdo.
Şar vîneno ke PDK sinorê Rojawanî de qereqolanê neweyan virazeno û çekanê giranan tîya ca keno. Berê Pêşxabur o ke ver bi Berê Sînorî yê Sêmalka de yo nizdê 40 qereqolî ameyî viraştene. Wextê îdareyê BAASî de nê sînor de têna yew qereqol estbi. Şaro ke pratîke PKD û ENKSyî hol zano qerqilîyeno ke ê bi destê Tirkîya vera Rojawanî hêrşê îşxalî yê neweyî bikerê. Xora pêvînayîşê Neçîrvan Barzanî û îdarekaranê Tirkîya raştê nêrazîyîşê girdî ame bi. Yeno texmînkerdene ke nê pêvînayîşan de hemleyê neweyî yê vera Têgêrayîşê Azadîye yê Kurdan ameyî qiseykerdene. Tirkîya seba ke vînîkerdişê xo yê Heftanînî binimno beno hêrişê Rojawanî bikero. Qereqolê neweyî yê PDKyî nê şikî xorîyêr keno.
