Endama Koordînasyonê PAJKî Şimal Ulkem Guneş derheqê Qirkerdişê Zaxoyî yo ke dewleta tirke bajarê Zaxoyî yê Başûrê Kurdîstanî de kerd de ANFyî rê qisey kerd.

Guneşe vist vîrî ke dewleta tirke bi serran o wina qirkerdişan kena û vat:  ''Dewleta tirke bi serran o vera şaranê herême polîtîkaya qirkerdişî rayra bena. Bitayetî vera kurdan û ereban her hetî ra na polîtîkaya xo xorîyêr kerda. Vera gerîlayanê azadîye zî çeka kîmyewîye zî tede her qeyde çeke şuxulnena û qirkerdiş kena. Seba ke ma vera qirkerdişan yew nêbenê dewleta tirke her rojê hêriş û qirkerdişanê xo zêdînena.  Dewleta tirke estbîyayîşê xo çînkerdişê kurdan û şaran ser o nayo ro.

Têgêrayîşê Azadîye yê Kurdan serkêşîya Rayber Apoyî de 50 serrî yo vera hêrişanê qirkerdişî têkoşîn keno. Nê semedî ra bi hezaran şehîdê ma est ê. Bi Şorişê Rojawanî kurdan û ereban îtîfaq kerd. Dewleta tirke vera nê îtîfaqî vejîyena. Çunke nêwazana çew kurdan reyde îtîfaq bikero. Îtîfaqê dewleta tirke bi PDKyî zî na çarçewe de yo. PDKyî binê kontrolê xo de tepişena ke wa PKKyî ra dûrî vindero. Dewleta tirke vera îtîfaqê Rojawanî vejîyaye. Xora inkey hêrişê îşxalî yê vera Rojawanî rojdemê ci de yo.''

Guneşe vat ganî Qirkerdişê Zaxoyî zaf hetan ra bêro destgirewtene û wina dewam kerd: ''Ganî no qirkerdiş hetê sîyasî, leşkerî û dîplomasîyî ra rind bêro famkerdene. Qirkerdiş 20ê temmuze de bi, 19ê temmuze de pêvînayîşê Erdogan û Putînî bibi. Xora yeno zanayene ke dewleta tirke nê pêvînayîşî ra tiway dest nêfîna. Hema ke kombîyayîşî ser ra 24 saetî nêvertî ra herra Başûrî de hemwelatîye Iraqî ameyî hedefgirewtene. Waştişê înan qirkerdişo dahîna gird bi. Înan waşt ke dersêka pîle bidê şarê herême. Waşt mesajêkê sîyasîyî bidê şarê Başûrê ke paştî dano gerîlayan şarê ereban. Xeylet hetan ra vera qirkerdişî nêrazîbîyayîş ame mojnayene la no qîm nêkeno.

Dewleta tirke Başûr îşxal kerdo la heta nika hema qet yew selahîyetdarê PDKyî vera nê nêvejîyayo. Xora înan bi xo dewleta tirke arde herra Başûrî. Wazenê nê qirkerdişî zî bikerê PKK mil la qirkerdiş her hetî ra eşkerayo ke hetê Tirkîya ra ameyo kerdene. Dewleta tirke heta inkey na herre de wina xelyêk qirkerdişî kerdî. Fotografê Qirkerdişê Kortekî, gergûşe  Solîne hema mezgê heme vîrê heme kurdan de ya. Qirkerdişê Zergelê, Kanîmasî, reyna qirkerdişê Vakurî,qirkerdişê dewleta tirke yê Efrîn, Serêkanîyê, Girê Sipî hetê her kesî ra yenê zanayene. Vera Qirkerdişê Zaxoyî nêrazîbîyayîşo tewr pîl hetê têgêrayîşê ma ra ame dayene. Çunke tewr zaf ma hetê dewleta tirke ra ameyî qetilkerdene. Nê dejî tewr zaf ma zanê. Dejê şarê ereban ma ra holêr çew nêzano. Coka ez venga cinîyan û ciwanan dana; vejîyê waran qet yew beyraqe, dezgeh û komeleya tirkan herra Iraqî de meverdê.

Rixmê nêrazbîyayîşan qey dewleta tirke herra Iraqî ra nêvejîyena? Tay hêzî nêwazenê. Sere de PDK nêwazeno. Dewleta tirke pê nê qirkerdişan vana qey ma derbe wenê la ma têkoşînê xo xurtêr kenê. Şarê kurdî sey verî nîyo. Têgêrayîşê ma pê mîrasê 29 serewedaritişan vejîya werte. Coka  ma wayîrê tecrubeyî yê, ma do peyser game meerzê. Dewleta tirke verê çimanê pêro dinya de vera gerîlayan çekanê kîmyewîyan şuxulnena. Destê PDKyî de belgeyî zî est ê la vengê xo nêvejeno. Seba ke ê zî mîyanê nê hêrişan de ca genê qirkerdişan nimenê. PDK û keyeyê Barzanî wazenê serê Qirkerdişê Zaxoyî zî bîgêrê. Tirkîya de zî sere de CHP partîyê ke xo sey muxalefetî name kenê dormeyê AKPyî de kom bîyî. Vanê artêşa ma no qirkerdiş nêkerd. Hêzê demokrasîyî ganî hinda senî paştî bidê muxalefetî û kurdî keyeyê Barzanîyî ra senî bawer bikerê. Pêro dormeyê AKPyî de bîyî yew.

Vakur de tim qirkerdişî benê. Çar leteyanê Kurdîstanî de kurdî raştê hêrişan yenê. Bitaybetî Vakur de hêrişê sîstematîkî yenê kerdene. Vera nê hêrişan têna çend çalakîyî qîm nêkenê, ganî şar sere wedaro. Gerîlayê ke hêzê pawitişê şarî yê, xo ver danê la ganî zafêr paştî bidîyo gerîlayan.  Ganî şarê Iraqî zî vera hêrişanê dewleta tirke zafêr nêrazîbîyayîş ramojno. Ganî heme baregehê leşkerî û dezgehê îstîhbaratî yê dewleta tirke Başûrî ra bêrê vetene, bêrê vêşnayene. Wa dewleta tirke bêro boykotkerdene. Ganî hem hetê sîyasîyî ra hem hetê ekonomî ra şiro Tirkîya ser. Ez reyna şehîdanê Zaxoyî yad kena. Ez pê bawer a ke serêkşîya  cinîyan û ciwanna ê kurdan û ereban de qesasê şehîdan do bêro girewtene.''