Rîsipîyanê Wanî ard ziwan ke ê alozîya Başûrê Kurdîstanî bi baldarî teqîb kenê. Rîsipîyanê Wanî derheqê mesele de ANFyî rê qisey kerd.

Rîsipî Fuat Turgutî pare kerd ke mîyanê kurdan de çi mesele estba ganî pê dîyalogan çareser biba û vat: ''Ma qetî şerê zereyî yê kurdan nêwazenê. Ganî partîyê kurdî seba menfaatanê kurdan bixebitê. Ewro kurdî pêro dinya de şinasîyenê. Ganî partî û rêxistinê kurdî zî seba dewaya heqdare ya kurdan bixebitê. Vakurê Kurdîstanî de rew ra partîyê kurdî benê yew û pîya têgêrenê. Ganî pêro partîyê Başûrî, Rojawan û Rojhelatî zî wina bikerê. Ez venga PDK, YNK û Têgêrayîşê Goranî dana ke seba yewîya kurdan bixebitê. Ganî PDK nêro kayê dişmenî. Kerdiş û xîretê PDKyî qetî nênê qebulkerdene. Ganî PDK şerî ra xo dûrî bigêro.''

Risîpî Feyzî Canerî zî vîst vîr ke Mesûd Barzanîyî verî vatbi ke ê do meverdê kurdî têvera şer bikerê. Canerî vat: ''Kurdî destpêkî ra nata tim terefgîrê haştîye bîyî. Eke kurdî şerê zereyî bikerê pêro destkewteyê ma do destî ra şorê. Ganî kurdî yewîya xo awan bikerê. Ez venga Mesûd Barzanî û PDKyî dana ke wa biewnê tarîxê xo û pê kayanê dişmenî mexapîyo. Wextê referandumê Kurdîstanî de dost û embazanê înan înan rê gef werdbi. Wa PDK hol bizano ke kurdan ra ber dostê înan çin o.''

Rîsipî Sadrettîn Şenî vat: ''Ganî partîy,ê kurdî pîya bixebitê û îşxalî vindarnê. Ganî pêro partî, rêxistin û dezgehê kurdan yewîya xo awan bikerê. Referandumê Başûrî de ma dî ke kamî Başûrî rê gef wend. Wexto ke DAÎŞî hêrişê Başûrî kerd kam verî şi vazda seba hetkarîye? Ez venga PDKyî dana ke na xeletîye ra abigêro û seba yewîya kurdan bixebito. Ganî Mesûd Barzanî xeyalanê şerî ra fek vera bido.''

Rîsipî Hasan Kaçano ke 1973 de tewrê şorişê Başûr bibi vat: ''O çax înan seba dewaya Kurdîstanî nê seba keyeyê Barzanîyî şer kerdêne. Coka ez agêraya ameya Vakur. Dewleta tirke nika xîret keno ke Başûr îşxal bikero. PDK zî wazeno hêrişê gerîlayan bikero. Ganî Barzanî cade nê xîretan ra fek vera bido. Ewro kurdan rê têna yewîye lazim a. Ez venga Mesûd Barzanîyî dana ke wa wayîrê vateyanê xo yê verênan vejîyo û goş bido vengdayîşanê yewîye.''