Mudirîya Çewlîgî ya Karanê Awe yê Dewlete (DSÎ) seba ke verê laseran bêro girewtene bire daye ke Layê Çapaxçurî de 11 bendê tersîpî û kanalê betonî bêrê viraştene.

Şarê şaristanî da zanayene ke nê awanîyî do nêeşkê verê laseran bigêrê û cuya xozayî bixeripnê.

Hemwelatîyêkî vat: ''Semeda herra dewanê Şabanan û Kurmanî ra Gelîya Çapaxçurî de laser wurzeno. Wexto ke varan vareno herra gelîye şina binê erdî û resena çemî. Eke darî bêrê ronayene, dêsê kerrayînî bêrê viraştene verê nê laseran do bêro girewtene. Dewijî nêwazenê xozatîya gelîye bêra xirabkerdene. Gelîya Çapaxçurî de xeylêk nebatê endemîkî estê û tîya seke depoyê awe yê Çewlîgî yo. Ganî projeyê DSÎ bêro betalkerdene û pêşnîyazê şarî bêrê caardene.''

Mudirîya DSÎ cewab da waştişnameyanê şarî û da zanayene ke ê do proje betal nêkerê.

Semedo ke bendî laserî ra rijîyayî masêyî nêeşkenê şorê corê gelîye. Şarê Çewlîgî wazeno ke hetê cêr û corî yê Pirdê Abdullah Bazencîrî pê kerreyan bêrê dekerdene û seba masêyan rayîrê derbazbîyayîşî bêrê viraştene.

Şarî vat nika sezonê hakkerdişê masêyan o coka ganî DSÎ cade na xebate bikero û pêro xebetan de zî seba masêyan rayîrê derbazbîyayîşî bêrê viraştene.