Wextêko kilm cuwa ver sîyasetmerdar, parlementer û îdarekaranê herêmî ra heyetêkê Ewropa herêma Îdareyê Xoserî yê Rojawanî zîyaret kerd. Endama Meclîsê Şaredarîya Parisî û pawitoxa heqanê merdiman Geneviève Garrigosa ke nê heyetî de ca girewt ANFyî rê qisey kerd.

Geneviève Garrigos ard ziwan ke heyetî Hemserekê Îdareyê Xoserî, Fermandarê Pêroyî yê QSDyî Mazlûm Ebdî, îdarekarê YPJ û YPGî, hemşaredarê Kobanê zî tede xeylêk kesan de pêvînayîş kerd û nê vatî: ''Hema hema ma pêro Rojawanî Dîcle ra heta Fratî gêrayî. Ma şîyî Qamişlo, Hesekê, Reqa û Kobanê.

Bi bedilanyîşê rejîmê Şamî haştîye nêameya. Bombarduman û hêrişê dewleta tirke bi destê Artêşa Mîlî ya Sûrîye (SMO) dewam kenê. Şaro ke 2018 de Efrînî ra vejîya şi Şehba û dima ra ûca ra zî mecbur mend bivejo, nika Reqa de maneno. Rewşa nê kesan raştîye fînena çiman ver. Şaro sîvîlo ke Awbendê Tişrînî de raştê hêrişê dewleta tirke ame, ma înan reyde qisey kerd. Sîvîlî bi wesayîtanê hewayî yê bêmerdiman yenê hedefgirewtene. Şam de îqtîdar bibedilîyo zî Rojawan de şar xo mîyanê şarî de hîs keno. Nê hêrişê ke vera şarê sîvîlî yenê kerdene sûcê şerî û sûcê merdimîye yê.

Îdareyo Xoser hetêkî ra vera tehdîtanê vera herême şer keno, hetê bînî ra sîstemê konfederalê demokratîkî yo ke merkezê ci de cinî est a, dano ciwîyayene. Îdareyo Xoser bi sîstemê xo yê demokratîkî semedê ameyoxê Sûrîye mesajo xurt dano îqtîdarê Şamî. Gerek hukmatê Şamî modelê Rojawanî sey nimûne bigîro. Hêzê huqûqî yê mîyanneteweyîyî gerek vera dewleta tirke, Rojawanî bipawê.

Ma zîyaretê xo yê Rojawanî de dahîna nizdî ra dî ke têkoşînê vera DAÎŞî de senî bedelê girdî ameyî dayene. Kampa Holî de bi hezaran çete û merdimê ci manenê: Ma rijyayîşê Reqa  dî ke newe ra yeno înşakerdene. Fedakarîya ke ma Şehîdgehê Kobanê dîye bedelanê tewr girdan ê tarîxê merdimîye ra yew a. Gama ke înşayê Sûrîye yeno mûnaqeşekerdene gerek hêzê mîyannetweyîyî Rojawanî çirey rîser meverdê. Wayîrvejîyayîş û pawitişê Rojawanî semedê ma perûne berpirsîyarî û wezîfeyo ehleqî yo.''