Agirî û Mêrdîn de bi seyan kesan şînê kedkaranê çapemenîya azade Nazim Daştan û Cîhane Bîlgîn zîyaret kerdî ke hêrişê dewleta tirke ya îşxalkere de ameybî qetilkerdene.

Qezaya Dîyadînî ya Agirî de Keyeyê Şînî de girseyî şîyî seba şînê Daştanî. La polîsan nêverda ke keyeyê şînî de şîn bêro ronayene. Naye ser o keyeyê Daştanî banê xo de şîn naro. Ban binê ablûqayanê polîsan de yo. 

Ewro serkêşîya MEBYA-DERî de îdarekaranê DBP, DEM Partî, TJA û xeylê kesan şîn zîyaret kerd. Temsîlkarê MEBYA-DERî yê Agirî Burhan Kartalî tîya de dîyar kerd ke Nazimî û Cîhane seba parekerdişê raştîyan ganê xo da.

Dima endamanê Komeleya Rojnamegeran a Dîcle-Firatî (DFG) û Komeleya Rojnamegeran ê Cinîyan ê Mezopotamya MGK) zî şîn zîyaret kerd. Temsîlkarê Wanî tê DFGyî Adnan Bîlenî şîn de vat ke ê do têkoşînê meslekdaşanê xo rê dewam bikerê.

Mêrdîn de cinîyan serkêşîya TJA de ver bi cayê şînî rayraşîyayîş kerd. Rayraşîyayîş de cinîyan rixmê astengîya polîsan zî sloganê xo vatî û bendê polîsan derbaz kerdî. Polîsan tîya de muxabîra JINNEWSî Oznure Deger rê heqaretî kerdî.

Cinîyî verê keyeyê Cîhane Bîlgîn de bi sloganê 'Şehîd namirin' ameyî pêşwazîkerdene.Wekîla DEM PArtî Salîha Aydenîz tîya de qisey kerd û vat ke seba çareserîya ganî tecrîdê vera Rayber Apoyî biqedo.

Oznure Deger nameyê DFGyî ser o qisey kerd û vat: ''Têkoşînê Nazim û Cîhane do têkoşînê ma xurtêr bikero. Bijî Çapemeniya Azad.”

Vervatoxa TJA Gulîstane Sarili û aktîvîsta TJA Hatîce Oncu zî ard ziwan ke qelema raştîyan do bêveng nêmana.''