Wekîlê YNKyî yê verênî û Endamê KNKyî Muhsîn Osmanî destkewteyê Rojawanî û hêrişê îşxalî yê vera nînan ajansê ma rê ercnayî.

Muhsîn Osmanî pare kerd ke ganî vera hêrişanê îşxalî tewirê yewîya neteweyîye bêro mojnayene û vat: ''Ez pêro gerîlayan, şerwananê Rojawanî û pêşmergeyan selam kena. Ewro seba şarê ma firsendêko pîl vejîyayo. Rojawanê Kurdîstanî zî do sey Başûrî bibê wayîrê destkewteyan. La dişmen seba ke nê destkewteyan çin bikero do her çî biceribno. Ganî merdim dişmenî rê ney hemkaranê dişmenî rê lomeyê xo bikero. 

Seba ke mîyanê kurdan de yewîye bêra caardene destkewteyê Rojawanî firsend ê. Dişmenê ma wexto ke babete bena meseleya kurdan benê yewca. Ganî ma zî seba dewaya xo cîyayîyanê xo bidê kiştê û bêrê yewca.''

Osmanî da zanayene ke Rojawanê Kurdîstanî prosesanê zehmetan ra derbaz beno û vat: ''Ma venga pêro rêxistin, şexsîyet û dezgehanê Kurdîstanî danê ke yew bibê, hemkarîya dişmenî mekerê, yewîya Rojawanî bîyarê ca. Eke destkewteyê Rojawanî destî ra şorê, destkewteyê Başûrî zî do şorê. Dişmen dişmenê pêro kurdan o.

Wa lobîyê kurdan her ca ra xebatanê dîplomasîyan bikero, çalakî û aktîvîteyan bikero, paştî bido têkoşînî. Kurdî Peymana Lozanî ra nata bedelanê giranan danê. Ereb, tirk û farsî verê azadîya kurdan de astengîyan kenê. Heta ke kurdî dewleta xo awan nêkerê, azad nêbê ereb, tirk û farsî zî do rehet nêbê. Çunke meseleya verêne çaresernêkerdişê meseleya kurdan o.''

Osmanî qiseyê Mazlûm Doganî 'Ciwîyayîş xoverdayîş o' vist vîrî û îfade kerd ke Kobanê tarîxê xoverdayîşê kurdan de kelayêk a. Osmanî vat: ''Kobanê sembola xoverdayîşî ya. Bi hezaran qehremananê ma Kobanê de bedelî dayî. Ewro zî qehremanê ma hê xo ver danê Ganî ma nê xoverdayîşî vila bikerê û dormeyê ci de bêrê pêser.''