Taxa Hêzanî ya Amedî de 28ê hezîranê 2013î de potestokerdişê qaleqolan de Medenî Yildirimo 19 serre hetê leşkeranê tirkan ra amebi qetilkerdene. Ewro merdimê ey ke semedê yadkerdişî şîyî goristan dîyî ke gorî rê hêriş ameyo kerdene.

Merdimê Medenî Yildirimî û îdarekarê MEBYA-DER û HDPyî yê bajarî Goristanê Yenîkoyî yê Rezanê Amedî de semedê yadkerdişê vîrardişî ameyî têhet. Badê wendişê dûayan maya Yildirimî Fahrîye Gunduz qisey kerd.

 Gunduze seba ke gorê lajê ci rê hêriş ameyo kerdene nêrazîbîyayîş ramot û vat: ''No zulm o. Ez 7 serrî yo pawena ke wa qetilkarê lajê mi bêrê cezakerdene. Verê çimanê ma de qetilkeran pawenê. Hetê bînî hêrişê gorê lajê mi kenê. No senî vîjdan, senî ehlaq o? Şima gorê lajê mi ra çi wazenê? Hînî bes o. Ma kurdê û ziwanê ma kurdkî yo. Bi mirnayîş ma nêqedîyenê. Şima nêeşkenê ma biqedînê.''

Hemserekê HDPyî yê Amedî Zeyat Ceylanî bale ante ke 7 serrî yo hema edalet nêameyo caardene û waşt ke wa edalet bêro caardene qetilkarî bêrê cazakerdene.