Grevê vêşanîye yê Nasir Yagizî roja 106’ine de yo

Hewlêr de grevê vêşanîye yê bêdem û bêagêrayîşî yê Nasir Yagizî roja 106’ine de dewam keno. Çalakîya grevê biagêrayîşî hetê gruba neweya 53’ine ra ameye dewrgirewtene.

Grevê vêşanîye yê bêdem û bêagêrayîşî yê Nasir Yagizî yo ke seba wedaritişê tecrîdê serê Rayberê Şarê Kurdî Abdullah Ocalanî Temsîlkarîya HDP’yî de amebi destpêkerdene, roja 106’ine de yo. Hetê bînî ra grevê biagêrayîşî zî bi dewrgirewtişê gruba 53’ine dewam keno.

HER KE ŞINA ÇALAKÎYE GIRD Û VILA BENA

Merasîmê dewrgirewtişî de Temsîlkarê HDP’yî yê Hewlêrî Abid Îkeyî eşkerayîyêk daye. Çalakîya grevê vêşanîye yê bêdem û bêagêrayîşî yê Temsîlkarîya HDP’yî ya Başûrê Kurdistanî 106 rojî peyê xo de verdayî. Îkeyî vat: “Çalakîya grevê vêşanîye ya ke vera faşîzm û tecrîdê serê Rayberê Şarê Kurdî Abdullah Ocalanî ameye destpêkerdene her roje her ke şina gird û vila bena.”

8’Ê ADARE Û NEWROZE DE ÇALAKÎYE GIRDÊR BIKERÊ

Îkeyî bale ante serê girdbîyayîşê grevî û wina dewam kerd, “Destpêkê menga Adare de zaf hepisxanyanê Tirkîya û Kurdistan de girewteyanê dewaya PKK’yî û PAJK’î dest bi grevê vêşanîye kerd. Na çalakîye her ke şina gird û vila bena. Çi beno wa bibo do çalakîya grevê vêşanîye û çalakîyê verê tecrîdê Rayberîya ma dewam bikerê. Na hûmara do sere de Kurdistan de, teberê welatî de û her ca de xurt biba û waştişanê Leyla Guvene, Nasir û girewteyanê hepisxaneyan biresnê her ca. Verê ma de 8’ê Adare, reyna Newroze esta, ganî şarê ma coş û hêzê çalakîye nê rojan de biresno tîtik û bieşkayo tecrîd biwedaro.”

Temsîlkarê HDP’yî Abid Îkeyî tewr peynî de vengdayîş şarê Başûr û her kesî kerd ke tewrê çalakîye bibê û hîna zêdetir çalakwanan ra wayîrê bivejîyê.