Tersê PDKyî yo tewr pîl o yo ke hêrsê şarê Başûrê Kurdîstanî do bivurîyo hêzêko rêxistinbîyaye. Çunke o tradîsyonê xoverdayîşî yê şarî zaneno.

Dewleta tirke planê xo yê îşxalî rê bi destek û hemkarîya PDKyî dewam kena. Hinî sebrê şar û gerîlayan rolê PDKyî yê xirabî rê nêmendo. Roniştoxê Amedîyê ke her roje konvoyê artêşa tirke mîyanê şaristanê înan ra derbaz benê, dewijê Guherzê yê ke her roje obus û topê hawanî kewenê bax û baxçeyanê înan, dewijê ke erdê xo ra bi zorî yenê vetene, dewijê Sergelê yê ke baxçeyê înan yenê vêşnayene pabeyê ci yê ke PDK û artêşa tirke ra bixelisê. Hêvîya nînan a tewr pîle zî serkewtişê gerîlayan o.

Tersê PDKyî yo tewr pîl o yo ke hêrsê şarê Başûrê Kurdîstanî do bivurîyo hêzêko rêxistinbîyaye. Çunke o tradîsyonê xoverdayîşî yê şarî zaneno. Taloqkerdişê weçînayîşan ra aseno ke PDK senî îradeyê şarî ra terseno. 

Medyaya PDKyî hêrişanê hîrê temmuze yê artêşa tirke ra dima seba ke nêrazîbîyayîşanê şarî bikêmîna dest pê zûran kerd. Medyaya qet yew welatê bînî hende seba asayîkerdişê îşxalî xîret nêkerdo. Wexto ke ma xebera kanala K24î temaşe kerd ma fam kerd ke çapemenîya PDKyî zûran û şerê taybetî de sînoran nêşinasnena.

Muxabirê K24î vano ke Amedîyê de turîstî qalê heybetî û xozaya herême kenê. Gelo leşkerê tirkî yê îşxalkerî turîst ê? Çita nînan rê weş yeno? Dûyê çekanê kîmyewîyan ê Girê Amedîyê gelo nînan rê weş yeno? Vêşnayîşê daristanê Sergelê û dewanê Amedîyê nînan rê weş yeno?

Muxabîrê K24î seba ke bimojno ke Amedîyê çend aram a, dîmenanê çend kuçeyan gêno. La o kameraya tayêk bizivirno îşxalê artêşa tirke do biaso. Dima muxabîr çend kesanê amadekerdeyan de roportaj keno ke nê kesî vanê ke her roje bi hezaran turîstî verê xo danê Amedîyê.

La şarê Amedîyê goşanê xo biqefilno zî do nêeşko vengê teqayîşan nêeşnawo. Medyaya PDKyî îdîa kena ke şar mîyanê aramîye de yo. La gerîlayî di serrî yo herême de vera îşxalî xo ver danê. Xêrê nê qehremanan ra di serrî yo artêşa tirke nêeşkena Girê Amedîyê îşxal bikera. Amedîyê mîyanê aramîye de nîya. Amedîyê de hêrişê îşxalî yê tewr pîlî est ê. Leşkerê tirkî seba temaşekerdişê rindîya Amedîyê ney seba îşxal û qirkerdişî şîyî uca. 

Rayber Apo ercnayîşanê xo yê ''Perspektîfanê Başûrî'' de vano: ''PDK hêzêko hemkar o û pabesteyê îradeyêkê serdestî yo. Wexto ke îradeyê serdestî waşto PDK tewrê şerî bîyo. Rejîmê tirkan naye ser o paştî daye dewleta kurdan a federale. Çunke rejîmî waşt ke PDK Başûr de tecrîd bikera û pê ci vera PKKyî şer  bikera.''

Nê analîzê Rayber Apoyî serran ra dima ancî têkoşînê gerîlayan rê benê perspektîf. Coka nê hêzê ke kerdişanê dewleta tirke hol analîz kenê, pawitoxê rûmetê şarê Başûrî yê.

Medyaya PDKyî bi qiseyê 'Amedîyê de aramîye est a, Amedîyê de turîzm aver şino' teyna eşkena xulamanê Keyeyê Barzanîyan bixapîna. La do nêeşka kurdanê welatperweran bixapîna. Hela hela do qet nêeşka Gerîlayanê Azadîye yê Kurdîstanî bixapîna.