Hemsereka Konseya Rayberdişî ya KCKyî Besê Hozat Stêrk TV de bîye meymana bernameyê taybetî û rojdem ercna. Besê Xozat destpêkê qiseykerdişê xo de Leyla Agirî yad kerde ke hêrişê dewleta tirke yê vera Herêmanê Pawitişî yê Medya de şehîd bîye.

Qiseykerdişê Besê Hozat ra beşêk wina yo:

''Tewirê Ebru Tîmtîk û Aytaç Unsal tewirêko rûmetîn bi, xoverdayîşê înan ercîyaye yo. La gereka komel wayîrê înan vejîyo. Nêbo tira netîce nêna girewtene. Seba ke faşîzm bêro çinkerdene no şert o.

Îmrali de edalet, huqûq, demokrasî çin o.CPTyî zî eşkera kerd ke Îmrali de tecrîd esto. Yew meşrûtîyetê Îmraliyî nêmend. Xoverdayîş û têkoşînê şarê ma her çi eşkera kerd. Dinya de hînî çew nê tecrîdî qebul nêkeno. Hînî wextê ci ameyo ke Rayberîye azad bibo. Rayberîye çareserîya Rojhelatê Mîyanênî ya, dermanê meseleya kurdan o. Eke Rayberîye azad biba Kurdîstan û Rojhelato Mîyanên zî azad benê. Tecrîd zî seba naye yeno pîlkerdene.

Dewleta tirke Kurdîstan de polîtîkayanê qirkerdişî ana ca. Hedefê ci de zî hêverî cinîyê kurdî estê. Çunke cinîyê kurdî rayberîyê xoverdayîşî kenê. Tecawuz Kurdîstan de parçeyê polîtîkayanê qirkerdişî yê dewleta tirke yo. Tecawuzker Musa Orhan waştişê Suleyman Soyluyî ano ca. Soylu înan rê vano 'Cinîyanê kurdan rê tecawuz bikerê, heqê şima yo. Cinîyan, ciwananê kurdan bimusnê fuhuş û kundoxan.' No konseptêk o. Dewlete tecawuzkeran pawena. Gulîstane Doku zimistanî ra nata rojdem de ya. Gulîstan vînbîyaye nîya kişîyaye. Polîsî a kişte. Îpeke Er zî ameye qetilkerdene, xo nêkişt. Cinîyê kurdî polîsan, leşkeran reyde benê waştî. Kurdîstan de nêbeno ke şima dişmenê xo ra hes bikerê. Na rewşe raşt nîya, ma qebul nêkenê. Ganî keyeyê domananê xo rind perwerde bikerê, weye bikerê. Domanê kurdî wa hîşmendîa dewleta tirke hol fam bikerê. Ciwanê ma seba ke qesasê Gulîstane Doku, Îpeke Er, Zeynepe bigêrê wa tewrê gerîlayan bibê.

Dewleta tirke wazena ke kurdî vera yewbînan şer bikerê, destkewteyanê kurdan çin bikera. Ma vat ke dewleta tirke wazena PKK tasfîye bikera û PDK beno hemkarê plananê tasfîye yê dewleta tirke. La PDKyî heta nika nêvat ke wina yo yan zî nê wina nîyo. Tewirê PDKyî mojneno ke ê dewleta tirke reyde têgêrenê. Seba dewleta tirke PKK verê qirkerdişanê aye de asteng o. Eke PKK çin bikera eşkena kurdan zî qir bikera. Başûr de 500 dewî ameyî vengkerdene. PDK vano wa PKK çeka xo war verdo şoro sîyaset bikero. Vakur de bi hezaran sîyasetmedarî zîndanan de yê. Şima senî eşkenê wina vajê, no senî yew exlaq o? PKKyî seba ke kurdî ameyêne qirkerdene çeke girewte xo destî.

PDK bi ziwanê dişmenî qisey keno. Nêçîrvan û Mesrûr zî sey Erdogan vanê ke heqê dewlete esto ke erdê ma îşxal bikera. PDK polîtîkaya îşxalî ya dewleta tirke keno meşrû. PDK nika hetê dewleta tirke de wazeno PKK tasîye bikero. Ma senî înan rê vajê wayûbira? Eke pêşmergeyî hetê dewleta tirke de vera gerîlayan şer bikerê no nêbeno birakûjî. No beno şerê PKK û dişmenê ci. Eke PDK hêzê kurdan o wa hetê PKKyî de ca bigêro. Dewleta tirke wazena ke pêşmergeyî hetê aye de bibê. Dewleta tirke hedef kena ke pêro Başûr îşxal bikera. Ez venga PDKyî dana ke têkilîya xo ya bi Tirkîya çin bikero.

Heta ewro qet PDKyî seba azadîya Rayberîye veng nêda. PDKyî heta ewro qet dewleta tirke rexne nêkerda. La îşxalê dewleta tirke sey meşrû dî. PDK ganî na xeletîye ra fek vera bido. Eke PDK nêwazeno bibo bêbext wa nê sûcî nêkero. Wa PKK û kurdan ra efûya xo biwazo, xeta neteweyîye de têbigêro. Wa PDK û pêşmergeyî hetê ma de bibê vera îşxalê dewleta tirke şer bikerê.

Mustafa Kazimî û Fuad Huseyînî (Wezîrê Karanê Teberî yê Başûrî) Amerîka de tay pêvînayîş kerd. Ma tîya ra fam kenê ke Planê tasfîye yê dewleta tirke hetê Amerîka ra zî ame tesdîqkerdene. Amerîka wazena PKK bêtesîr û qels bikera û wazena Iraq zî tewrê nê planî bikera. Amerîka hetêkî ra QSD û MSDyî reyde têkilîyan nana ro hetêkî ra zî têgêrayîşê ma înkar kena. PDK zî wina keno. Ganî şarê ma na saxtekarîye bivînê. MA venga Amerîka danê ke seba ke meseleya kurdan bi rayîranê demokratîkan çareser biba têbigêra. Ganî Amerîka Rayber Apoyî reyde pêvînayîş bikera.

Dewleta tirke polîtîkaya Osmanijan ana ca û wazena pêro Rojhelatê Mîyanênî îşxal bikera. Ganî ciwan û cinîyê erebî hetê şarê kurdî de ca bigêrê. Ganî ma vera dewleta tirke pîya têkoşîn bikerê.

Ne dewleta tirke, ne PDK ne zî Iraq Şingal de wayîrê heqêkî nîyo. Şingal de têna yew hêzo meşrû esto o zî hêzê Şingalî yê. PDK YBŞyî rê vano meşrû nîyo la aslê xo de o meşrû nîyo. Şingal de hêzo tewr meşrû YBŞ yo. Ganî pêro dinya û êzidîyî nê hêzî nas bikerê.

2 mengan ra nata Heftanîn de xoverdayîşêko pîl esto. Artêşa tirke ewro Heftanîn de derbanê giranan wena. Ez pêro şehîdanê Heftanînî bi mînet û rêzdarî yad kena. Nê xoverdayîşî ra nêbîyêne dewleta tirke rewî ra Başûr îşxal kerdêne. Dewleta tirke bêguman do nêresa armancê xo. Coka ganî şarê Başûrî zî tewrê nê xoverdayîşî bibo.

Pêvînayîşê Cenevre bîyî sey kayê tîyatroyî. Îdareyê Rojawanî zî nê pêvînayîşan zaf keno cidî. Cergî dormeyê masa de yê. Nê cergî her roje Rojawan de qirkerdişan, tecawuzan kenê. Îdareyê Rojawanî înan reyde çira ser o nîqaş bikero?No raşt nîyo. Astana zî wina ya. Pêro kayê Amerîka û Rûsya yê.

Îdareyê Rojawanî herinda naye de xo rêxistin û hêzêr bikero. Dewleta tirke wina nêvindena û do pêro Rojawan îşxal bikera. Ganî şarê ma bi ruhê QSDyî şer bikero. Pêro cinî, camêrd, ciwan û kokimê Rojawanî ganî çekan bigêrê xo destî. Ganî rojdemê Rojawanî îşxal, hêriş, dron, SÎHA bibo; pêvînayîşan nê.

Hêrişê vera Çimeyanê Munzurî parçeyê polîtîkayanê qirkerdişî yê dewlet ê. Ê wazenê ke bawerî, kultur, erjanê Dêrsimî çin bikerê. Nê kerdişî dewamê Terteleyê Dêrsimî yê. Ganî şarê ma vera nê hêrişan bi têkoşînê bihêzêrî cewab bido.''