Hemsereka Konseya Rayberdişî ya KCKyî Besê Hozat Radyoyê Dengê Welatî rê qisey kerd û rojdem ercna.

Qiseykerdişê Besê Hozat ra beşêk wina yo:

''Rayberîye 23 serrî yo binê tecrîdêkê giranî de ya. Ê wazenê Rayberîye teslîm bigêrê. La ê do qetî ser nêkewê. Rayber Apo bi qerardarî têkoşîne çareserîya meseleya kurdan rê dewam keno. Hêzê mîyanneteweyî zî semedê menfaatanê xo vera sîstemê tecrîd û îşkenceyî yê Îmraliyî bêveng manenê. La bi taybetî 6 serranê peyênan de Îmrali de xoverdayîşêko pîl esto.Ewro pêro dinya azadîya Rayberîye wazena. Hemleya ma 'wextê Azadîye' bi serkewtişî dewam kena û do ser bikewa. Wext wextê azadîye yo. Ma do serra 2022î de tecrîdî bişiknê û Rayberîye azad bikerê. Armancê ma yo esas no yo coka têkoşînê ma do xurtêr bibo.

Embazanê zîndanan bi hawayêkê xurtî rayberîya hemle kerde. Nika zî ê pê metodanê cîyayan xoverdayîşê xo rê dewam kenê. Dewleta tirke zîndanan de polîtîkaya qirkerdiş, teslîmgirewtiş û îradeşiknayîşî ana ca. La embazî vera ney vindenê. Tedayê giranî yê vera tepişteyan parçeyêkê konseptê îmhakerdişî yo. Dewleta tirke vînena ke zîndanan ra netîce nêgêna hîna bena har û hêrişê embazan kena.

Îqtîdarê Tirkîya keno ke pê şer, şîdetî, îmha û înkarî estbîyayîşê xo rê dewam bikero la hînî peynîya ci ameya. Tirkîya de krîzê sîstemî esto û AKP krîzî keno giranêr. AKPyî heta nika pê paştdayîşê hêzanê mîyanneteweyîyan qirkerdişî kerdî la na ra pey ê zî do hende paştî nêdê AKPyî. Planê înan ê çokdayîşî ewro înan qedîneno. Dewleta tirke vera kurdan, gerîlayan, Rayberîye zîndanan, cinîyan û pêro komelî şer kena. Yanî hînî eqlê xo pernayo.

Zîndanan heta nika îradeyêko pîl mojna û ganî nika ra pey zî ney rê dewam bikerê. Embazê zîndanî wayîrê mîrasê Xoverdayîşê 14ê Temmuze vejîyenê. Bi hezaran embazê ma yê cinîyî zîndan de yê û ê tewir, îrade, hişmendî û bawerîyêka pîle pêşkêş kenê. Ma înan xo rê mîsal gênê. Çunke ê maruzê îşkenceyanê tewr giranan manenê la xo ver danê. Embazan ê cinîyan heta nika rayberîya xoverdayîşê zîndanan kerde û ê do nika ra pey zî ney rê dewam bikerê.

Herêmanê Pawitişî yê Medya de vera artêşa tirke ya îşxalkere 6 mengî yo xoverdayîşêko pîl esto. Dewleta tirke armanc kena ke gerîlayan tasfîye bikera û Başûrî bi temamî îşxal bikera. Gerîlayî Vakur de Başûr de her ca de xo ver danê. PDK zî mîyanê hêrişanê qirkerdişî yê Tirkîya de ca gêno û hetkarîya Tirkîya keno. Başûr de se ra 90ê hêrişê hewayî pê îstîxbarato ke PDK dano MÎTî yenê kerdene. PDK ca û koordînatanê gerîlayan dano, rayîran birneno, ablûqa keno. Xelîfan de 6, cayêkê bînî de 3 embazê ma dafikanê PDKyî de şehîd bîyî.

PDK vano qey eke PKK tasfîye bibo o do çar parçeyanê Kurdîstanî de bibo îqtîdar. La eke Tirkîya PKKyî rasfîye bikera dore yena kurdanê xayînan zî. PDK vano meseleya kurdan çin a, Tirkîya welatêko tewr demokratîk o. Eke meseleya kurdan çin a çira Rayber Apo, sîyasetmedarê kurdî zîndan de yê, vera HDPyî dewaya qefilnayîşî esta û Rojawan îşxal bena? Ganî PDK nê vateyê xo şarê ma rê îzeh bikero û çi ser o Tirkîya reyde bazarîye kerda eşkera bikero. Dewleta tirke çi soz dayo PDKyî? Eke PDK şerê Tirkîya de ca megêro dewleta tirke nêeşkena vera gerîlayan şer bikera.

PDK îşxalê Tirkîya yê vera Rojawan û Başûrî keno meşrû, paştî dano ci. Na xete xetêka tehlukeyîn a û zerar dana kurdan. Nika PDK vera kurdan şer keno. PDK şirîkê AKP-MHPyî yo. PDK çira partîya faşîste MHPyî kişte de vindeno? Wa PDK nê çîyan şarê ma rê îzeh bikero.

Gerîlayî Başûrî pawenê. Vera Avaşîn, Zap, Metîna û verî zî vera Heftanînî hêrişê giranî estê. Dewleta tirke çeka kîmyewîye, çekanê qedexekerdeyan vera gerîlayan şuxilnena û bêmabên gerîlayan dana bombayan ver. Reyna zî nêeşkena netîce bigêra. Terz û taktîkê gerîlayan dişmenî bin kenê. Şerê dewleta tirke şero bêexlaq, şero bêmerdimîye yo.

Gerîlayî semedê erjanê merdimîye zî xo ver danê. Coka ganî şarê ma û merdimîye wayîrê gerîlayan vejîyê. Gerîlayî rolê xo anê ca û faşîzmî anê verê rijîyayîşî. Hînî karekterê şerî vurîya. Serkewtişo qetî şerê şorişgêrî yê şarî de yo. Xoverdayîşê gerîlayan parçeyêkê şerê şorişgêrî yê şarî yo. Coka ganî şarê ma bi xurtî mîyanê nê şerî de ca bigêro.

Îqtîdarê AKP-MHPyî ver bi rijîyayîşî şino. Coka waşt Amerîka ra paştî bigêro la Bidenî Tirkîya rexne kerde, nêwaşte. Tirkîya armanc kerd ke pê paştdayîşê Amerîka Rojawanî bi temamî îşxal bikera. Erdogan û Putin zî tay bazarîyan kenê. Erdogan semedo ke weçînayîşê 2023î qeenç bikero wazeno hêrişê Rojawanî bikero, HDP û kurdan rê zêdêr dişmenîye bikero. AKP ewro Vakurê Kurdîstanî de qedîyayo.

CHPyî semedê çareserîya meseleya kurdan tay gamî eştî. Tirkîya de kam wazeno îqtîdar bibo ganî meseleya kurdan verî çareser bikero. AKP do xîret bikero ke semedê îşxalê Rojawanî muxalefetî ra paştî bigêro û HDP têna war verdo. Ganî muxalefet vera nê komployî hişmend bibo, vera îqtîdarî vengê xo berz bikero. CHP eke wazeno meseleya kurdan çareser bikero wa paştî medo îşxalê Rojawanî, samîmî bo.

Şarê ma ganî hişmendîya faşîste-qirkere çar parçeyanê Kurdîstanî de vengê xo berz bikero û xoverdayîş pîl bikero. Eke ancî Rojawan bêro îşxalkerdene wa şarê ma bi hawayêkê topyekûnî xo ver bido. Şero şorişgêr ê şarî do qetî serkewtiş bîyaro. Pêro ferdê komelî sey şerwananê YPG, YPJ û QSDyî wa şer de ca bigêrê, erdê xo meteriknê. Eke îradeyêko winasên vejîyo werte dewleta tirke do nêeşka netîce bigêra.''