Merkezê Îrtîbatî û Çapemenîye yê HPGyî derheqê cenaza leşkerê tirkî ya ke destê înan de ya de eşkerayîyêke daye. Eşkerayîye wina ya:

''Ma seke eşkerayîya xo ya 21ê hezîrana 2022yî de dabî zanayene Hulusî Akar û Tayyîp Erdogan leşkeran seba pawitişê îqtîdarê xo verdenê waranê gerîlayan. Ê bi dirîtî mergê nê leşkeranê ke eynê înan de nîyê, rayaumûmîye ra nimnenê. Wa pêro şarê Kurdîstanî, şarê Tirkîya û rayaumûmîye bizanê ke artêşa tirke derbanê ke wena û merganê leşkeran nimnena. Têna no nê, artêşa tirke cenazayanê leşkeran erazî de verdena ke pûç bibê û nêdana keyeyanê leşkeran.

Ma eşkerayîya xo ya 7ê temmuza 2022yî de pare kerdbî ke 7ê temmuze de Warê Xoverdayîşî yê Girê Amedîyê de 2 leşkerê ke waştêne ver bi mewzîyanê şerî yê Girê Şehîd Pîrdoxanî şorê, ameyê cezakerdene û cenazaya yew leşkerî zî destê hêzanê ma de ya.

Ame qetîkerdene ke no leşkero ke 7ê temmuze de merdo û cenazaya ci destê hêzanê ma de ya, nameyê ey Nacî Kaygisizî yo. Eşkera bi ke no leşker pabesteyê hêzanê taybetan ê artêşa tirke yo û mergê ci rayaumûmîye ra yeno nimitene. Seke ma verî zî rayaumûmîye rê dîyar kerdbi ê kesê ke nê leşkeran şawenê seferê îşxalî yê vera Kurdîstanî wayîrê cenazayanê leşkeran nêvejîyenê. Coka ma venga keyeyê leşkerê bi nameyê Nacî Kaygisizî danê ke eke keye biwazo ma eşkenê bi rayîrê sivîlan cenazayê domanê ci bişawê ci. Keyeyê leşkerî eşkeno bêro qezaya Amedîyê ya şaristanê Dihokî ya Başûrê Kurdîstanî û tîya de bi rayîrê sivîlan ma de têkilîye virazo.''