Merkezê Îrtîbatî û Çapemenîye yê HPGyî nasnameyê 3 gerîlayan eşkera kerdî ke 26ê temmuze de nêzdîyê dewa Bêxme ya qezaya Xelîfanî ya Başûrê Kurdîstanî de têkilîya nê gerîlayan a bi HPGyî birîyabî.

Eşkerayîye wina ya:

''Ma verî rayaumûmîye rê dabi eşnawitene ke 26ê temmuze de nêzdîyê dewa Bêxme ya qezaya Xelîfanî ya Başûrê Kurdîstanî de têkilîya ma bi komêka embazan birîyaya. Hukmatê Başûrê Kurdîstanî û PDKyî heta nika derheqê mesele de vengdayîşanê ma û muracatanê keyeyanê embazanê ma rê cewabêk nêdayo.

Nasnameyê nê embazanê ke dewa Bêxme ya Xelîfanî de têkilîya ma ya bi înan birîyabî wina yê:

Nameyê Qodî: Serwer Serhat Name û Peyname: Erdal Aslan Cayê Bîyayîşî: Erzirom Maye-Pî: Zahîde – Seyîtxan

Nameyê Qodî: Wargeş Çavreş Name û Peyname: Ayhan Tatli Cayê Bîyayîşî: Şirnex Maye-Pî: Heyîçe – Suleyman

Nameyê Qodî: Dijwar Berxwedan Name û Peyname: Mahmut Xelef Cayê Bîyayîşî: Hesekê Maye-Pî: Rose Xelîl – Hesen Xelef

Embazê ma Serwer Serhat qezaya Karaçobanî ya Erziromî de dadîya xo ra bîyo û 2015 de wexto ke ciwanê kurdî sey 'mertalê gandarî' tewrê gerîlayan bîyêne o zî tewrê gerîlayan bi. Ey Xakûrkê ra heta Qendîlî, Xinêre ra heta Zapî xeylêk cayanê Herêmanê Pawitişî yê Medya de gerîlatîye kerde. Ey pê pratîkê xo tecrubeyî vistî destî, pê hîsanê welatperweran her cayê Kurdîstanî de kerd ke heqê zorîyan ra bêro.

Embaz Serwer 2010 de derbazê herêma Garzanî bi, 8 serran bêmabên tîya de têkoşîn kerd û wezîfeyê fermandarîye girewt xo mil. Ey Garzan de çend reyî vera dişmenî şer kerd, derbê giranî dayî piro û rayberîya xeylêk çalakîyan kerde. Ey wextanê tewr giranan da zî milîtanîya Apogîre ra tawîz nêda. O werteyê zimistanî de serd û sûpir de mend, lingê ci serdî ra vêşayî la îradeyê ci vera bi xurtêr. Garzanî ra dima ey akademî de perwerde dî. Perwerde ra dima ey Fermandarîya Eyaletê Xakûrkê de wezîfe girewt xo milî, no wezîfe bi serkewtişî ard ca. O wexto ke sey fermandarê eyaletî şîyêne cayê wezîfeyê xo yê neweyî 26ê temmuza 2021î de nêzdîyê dewa Bêxme de maruzê hêrişê PDKyî bi û a roje ra nata têkilîya ma ya bi ey birîyaye.

Embaz Wargeş Çavreş Şirnex de dadîya xo ra bi û 2012 de pê tesîrê Şerê Şorişgêrî yê Şarî herêma Besta de tewrê gerîlayan bi. O cade cuya gerîlatîye musa û ey kerd ke bibo layîqê cuya gerîlatîye. O serra 2013î de esasê apeyantişî ser o derbazê Herêmanê Pawitişî yê Medya bi. Embaz Wargeşî akademî de perwerde dî, wezîfeyê xo yê neweyî de kerd ke amade bo.Embaz Serwer wexto ke derbazê cayê wezîfeyê neweyî bîyêne maruzê hêrişê PDKyî bi û a roje ra nata têkilîya ma ya bi ey birîyaye.

Embaz Dijwar Hesekê de dadîya xo ra bi. O verî tewrê şerwananê Rojawanî bi û dima ke zulmê DAÎŞî ame qedînayene 2017 de tewrê gerîlayan bi. Bi nê hawayî ey PKK nêzdî ra şinasna. Embaz Dijwar akademî de perwerde dî û bi milîtanêko marîfetin ê PKKyî. Embaz Dijwarî  tim bi qerardarî û îdîa wezîfeyê xo ardî ca. O wexto ke derbazê cayê wezîfeyê neweyî bîyêne maruzê hêrişê PDKyî bi û a roje ra nata têkilîya ma ya bi ey birîyaye.