Merkezê Îrtîbatî û Çapemenîye yê HPGyî nasnameyê 3 gerîlayanê ke Mewzîyanê Xoverdayîşî yê Girê Sorî de hêrişê bi gazê kîmyewî yê artêşa tirke de şehîd bîyî eşkera kerdî.

Eşkerayîye wina ya:

''Ma eşkerayîya xo ya 8-11ê êlula 2021î de dabi eşnawitene ke Mewzîyanê Xoverdayîşî yê Girê Sorî de hêrişê bi gazê kîmyewî yê artêşa tirke de 3 embazê ma şehîd bîyî. Mewzîyanê Xoverdayîşî yê Girê Sorî de ke sînorê Tirkîya-Iraqî de yê gerîlayî vera hêrişanê bi metodanê gemarinan ê dewleta tirke xoverdayîşêkê tarîxî kenê. Goreyê agahîyanê ke embazan dayê ma kerd qetî ke embazê ma Ozgure, Serhildan û Argeş netîceya hêrişê kîmyewî de 3ê êlula 2021î de şehîd bîyê. Ma nê embazanê ke vera hêrişanê bêmerdimîye yê artêşa tirke ya îşxalkere şehîd xo ver da û şehîd bîyî bi minet û hûrmetî yad kenê.

Nasnameyê embazanê ma yê şehîdan wina yê:

Nameyê Qodî: Ozgure Bagok Name û Peyname: Fatma Balica Cayê Bîyayîşî: Mêrdîn Maye-Pî: Heybete – Ramazan Tarîx û Cayê Şehadetî: 3ê Êlula 2021î / Avaşîn

Nameyê Qodî: Serhildan Mordem Name û Peyname: Serdar Dinç Cayê Bîyayîşî: Wan Maye-Pî: Şefîka – Ahmet Tarîx û Cayê Şehadetî: 3ê Êlula 2021î / Avaşîn

Nameyê Qodî: Argeş Botan Name û Peyname: Hasan Emcur Cayê Bîyayîşî: Şirnex Maye-Pî: Kadîbe – Haci Tarîx û Cayê Şehadetî: 3ê Êlula 2021î / Avaşîn

Embaze Ozgure Nisêbîn de dadîya xo ra bîya. Embaze Ozgure wayîra têkoşînê cinîyan vejîyaye û tewra gerîlayan bîye. Aye Heftanîn de dest pê gerîlatîye kerde û nê 5 serran de bi taybetî Îdeolojîya Azadîya Cinîyan a Rayberîye ser o xo perwerde kerd. Aye pêro çalakîyanê Heftanînî de tewr vernî de ca girewt û serra 2021î de derbazê herêma Avaşînî bîye. Embaze Ozgure Avaşîn de pê moralê xo yê berzî cade warî musaye. A warê Girê Sorî de pê kesayetê xo yê kedkar û fedakarî mazhara rêzê embazanê xo bîye. Embaze Ozgure destpêkê hêrişan ra heta şehadetî pê îradeyêkê pîlî şer kerd, bîye mîsala cinîya kurde û tarîxê azadîye de cayê xo yo rûmetên girewt.

Embaz Serhildan Qelqelî de dadîya xo ra bîyo. O 2012 de Amed de bêteredut tewrê gerîlayan bi. Embaz Serhildanî bi serran Vakur de gerîlatîye kerde, çalakîyanê serkewteyan rê rayberîye kerde û dima Başûr de sey fermandarê gerîlayan wezîfe kerd. O 2016 de derbazê Avaşînî bi. Ey Avaşîn de tecrubeyê xo embazanê xo reyde vila kerdî, her cayê Avaşînî ra gêra û hêrsê vera dişmenî pê çalakîyan mojna. Embaz Serhildanî pê marîfetê xo yê şerî asta sêrkeşîya çalakîyan de wezîfe kerd. Ey tunelanê şerî yê Girê Sorî de pa embazanê xo bi qerardarî vera dişmenî şer kerd û rayîr nêda ci.

Embaz Argeş Cizîre de dadîya xo ra bîyo. Ey hema ke ciwan bi xebatanê partîye de ca girewt û dima zî tewrê gerîlayan bi. Embaz  Argeşî şerê vera DAÎŞî de cepheyê Mexmûr-Kerkûkî de têkoşîn kerd, binkerdişê DAÎŞî ra dima 2018 de derbazê Avaşînî bi. Embaz Argeş cade cuya gerîlatîya Avaşînî musa, tim peyê cigêrayîşan de bi. Ey semedo ke xeyalê xo yê tewr pîlî azadîya Rayber Apoyî bîyaro ca goreyê krîterê 'bi 24 saetan Rayberîye reyde ciwîyayîş û bi 24 saetan gerîlatîye' têgêra. Embaz Argeşî vera hêrişanê dewleta tirke Avaşîn de xeta fedayîtîye de şer kerd û pê tewirê xo o tim bi çimeyê moral û hêzî yê embazanê xo.

Embazanê ma Ozgure, Serhildan û Argeş pê têkoşînê xo mojna ke do rayîr nêdê polîtîkayanê îşxal û qirkerdişî. Sere de keyeyanê ercîyayeyan ê embazanê ma rê şarê Nisêbîn, Cizîre, Qelqelî û pêro şarê welatperwerî yê Kurdîstanî rê serweşîye wazenê.''