Dewleta tirke ya îşxalkere serra 2007î ra nata dewanê Binarê Qendîlî ser o bombayan varnena. Nê hêrişan de 25 kesî şehîd bîyî û bi desan kesî birîndar bîyî. Şarê Binarê Qendîlî da zanayene ke semedo ke mabênê Hukmatê Başûrî û dewleta tirke de peymana petrolî ya 50 serran esta hukmat vera îşxal û hêrişan bêveng o.

Dewa Mawnanî ya Balayanî de roniştox Muhammed Mavnanîyî îfade kerd ke bombardumananê dewleta tirke de bax, baxçe û warê cuye tarûmar bîyî. Mavnanîyî vat: ''Wa bêrê biewnê tîya tede hêzê PKKyî esto yan? Raşt nîyo ke çew vajo dewleta tirke têna PKK kena hedef. Keye û bînaya ma rijîyayî la çew paştî nêdano ma.''

Serra 2018î de dewa Serkanî ya herêma Balayan de dewleta tirke keyeyêkî ser o bombayî varnaybî. Bombarduman de 4 ciwanî şehîd bîyî. Eşkera bîyî ke eleqeyê nê ciwanan bi PKKyî çin o. Roniştoxanê dewa Serkanî ra Resul Qadirî vat: ''Serra 2015î de keyeyê ma bombardumanî de rjîya.  Ê 4 ciwanan ra yew zî dezayê mi bi. Tîya de PKK çin o. Dewleta tirke armanc kena ke Başûr îşxal bikera.''

Qadir Hemedî zî vat: ''Hemkaranê Tirkîya wareyê ma vist nê halî. Dewleta tirke pê petrolê ma welatanê bînan ra çekan gêna û ma kişena.''

Mêrdeyê Ayşe Resul serra 1987î de şerê vera rejîmê Baasî de şehîd bîyo. Ayşe vat: ''Hêrişanê dewleta tirke ra ez nêeşkena keyeyê xo de biciwîya. Dewleta tirke qestî ra ma kena hedef. Qirkerdişê Zargelê, Kortek, Biradost ve Şêladizê xeletî ra nêbîyî.  Hukmatê Kurdîstanî zî vano teyarayê tirkan ma hedef nêkenê. La her kes raştîye zaneno.''