Endamê Komîteya Rayberdişî ya PKKyî Duran Kalkanî derheqê serrgêra 38. ya Hemleya 15ê Tebaxe de ANFyî rê qisey kerd. Qiseykerdişê Kalkanî ra beşêk wina yo:

''15ê Tebaxe pê dehaya Rayber Apoyî qewimîya, pê bawerî û qerardarîya Rayber Apoyî rolêk girewt xo ser. Xoverdayîşê Zîndanî yê 1982î ra dima Rayber Apoyî çêrîye mojnaye. Na çêrîye kokê xo cuya azade ra girewtêne. Rayber Apoyî vat eke cuye estba ganî a cuye azad biba. Nê pêro çîyan kerd ke Hemleya gerîlayan a 15ê Tebaxa 1984î pê çalakîyanê Dih û Şemdînanî dest pêbikera.

15ê Tebaxe komelêko newe aferna û seba kurdan bi miladêk. Wa serrgêra 38. ya na hemle biba serra kurdan. Guleyo verên 15ê tebaxe de erzîya û 37 serrî yo bêmabên ma hê têkoşîn kenê. Xoverdayîşê kurdan xoverdayîşo neteweyî û xoverdayîşê pêro Rojhelatê Mîyanênî yo. 

Hemleya 15ê Tebaxe Kurdîstan de bîya vurîya bîya hemleya gerîlayan. 1979 de wexto ke PKK kewt Botan îdareyê ê çaxî yê Tirkîya kerd ke verê PKKyî bigêro. Nê îdareyî pê rayîrê tay 'dostan' 3 mengan kerd ke PKKyî reyde qisey bikero û PKKyî îqna bikero. La çewî no qebul nêkerd. Gerîlayî 1982 de şîyî warê Botan û Behdînanî. O çax Botan de rêxistinîyêka PKKyî çinbîye û Botanijî sempatîzanê PDKyî bîyî. Wexto ke embazî şîyî Botanî mîyanê şarî de coş û kelecanêko pîl virazîya. 

Botan bi zixmî wayîrê PKKyî û wayîrê 15ê Tebaxe vejîya. Kongreya 2. de bire dîyaye ke  hemle Botan de wa bêra geşkerdene. Ma şirnex û Colemêrgî rê vat herêma sereke ya şerî, herêma gerîlayan, merkezê gerîlayan. Çalakîyanê 15ê Tebaxe, çalakîyê Dih û Şemzînanî tewr zaf Botan de veng vet. Nasnameyo verên ê gerîlayan HRK bi. Hêzê Xelisnayîşê Kurdîstanî. No destpêk bi, gama verêne bîye. Îlanê xoverdayîşê gerîlayan bi. Çinbîyayîşo neteweyî pê 15ê Tebaxe vindert. Guleyo verên ê estbîyayîşê azadî 15ê Tebaxe de ame eştene. Kongreya 3. de hewcedarîya geşkerdişê şerî ser o HRKyî ronayîşê ARGKyî îlan kerd. Serra 2000î de dima ke paradîgmaya Rayberîye vurîyaye ARGKyî zî xo vurna kerd HPG. 

Serra 1977î ra nata mi Fermandar Egîd şinasnayêne. O mîyanê xebatanê ciwanan de vejîya vernî, Mazlûm Doganî reyde xebitîya. Êlih de, xoverdayîşê Sêwrege de ca girewt. 1979 de Egîd 15 kesan reyde vengdayîşê Rayber apoyî ser o şi Filîstîn, înan uca de perwerde dî. Egîd dima bi mesuldarê Êlihî. 1980 de o Kemal Pîrî reyde seba rêxistinîya Qerargehê Botanî agêra Sêrtî. Derbeya 1982î ra dima Egîd welatî ra vejîya teber, perwerdeyêko hol girewt. Rayber Apoyî embaz Mehmet Karasungur û Egîd seba rêxistinîya Başûr û rojhelatî wezîfedar kerd. 

Mi serra 83î de Fermandar Egîd warê Xerzanî yê Botanî de dî. Xora 84 de ey Dih de fermandarîya koma guleyê verêne ya gerîlayan kerde. Payîzê 84î de zî ey Botan de bêmabên şer kerd. Nîsana 85î de o reyna derbazê 'warê Rayberîye' bi û Şerê Botanî de ca girewt. 28ê adare de zî Gabar de şehîd bi. Bawerî û qerardarîya têgêrayîşê ma Fermandar Egîdî ra yenê. Embaz Egîd wayîrê kesayetê bawermend û qerardarî bi. O tim heqê zehmetîyan ra ame, caardişê serkewtişî zî ci rê esas bi. Embaz Egîd hem fermandar hem zî şerwanêk bi. 

Cayê çalakîyanê 15ê Tebaxe cayê qijî bîyî. Çunke ma waşt ke tede ma hol bi rehetî têbigêrê. Xora uca de çalakîyan ra ber vilawekî ameyî vilakerdene, qewexaneyan de qiseykerdiş ame kerdene. Yanî asta leşkerî û asta propaganda pîya bîyî. Ma plansazîyêka winasêne kerd ke wa çew 15ê Tebaxe xo vîr a nêkero. Ma 3 cayan de plansazîya çalakîye kerdbî. Embaz Egîdî Dih de çalakîye arde ca. Şemzînan de zî ameye kerdene la yê Şaxî nêbîye.

Dewleta tirke çalakîyê 15ê Tebaxe sey serewedaritişê neweyî yê kurdan pênase kerd. Dewleta tirke verî çalakîyî rayaumûmîye ra nimnayî. Dima înan vat 'terorîstan hêriş kerd, ma do înan 24 saetan de bêtesîr bikerê.' Înan bi nameyê 'Guneş'î operasyonêk da destpêkerdene. Axir ê nêeşkayî têgêrayîşê ma biqedînê. Mîyanê 37 serran de çalakîyê 15ê Tebaxe Vakurê Kurdîstanî ra vilayê her parçeyê Kurdîstanî bîyî. 

Mîyanê hende serran de gerîlayan artêşa tirke ya îşxalkere yanî artêşa NATOyî bin kerde. Coka vera Rayberîye komplo ame kerdene. Hemleya 15ê Tebaxe ra dima Kenan Evrenî şer da destpêkerdene. La o zî pê gerîlayan nêeşka. Heta hemle ra dima o ame Şemzînan, ey gerîlayan rê gef wend la wexto ke agêrayêne embazan da wesayîtê ci ro. Çalakîyê 15ê Tebaxe û pirodayîşê wesayîtê Evrenî çapemenîye de weşanîyayî. Îmajê ey kewt war. Çalakîyê gerîlayan hende bitesîr bîyî. Serebûtêkî ra berî ma Gabar de plansazîya 3 mengan de şehîdêk nêda.

Serra 84î de dişmen pêro çalakîyan de bin kewt. Wisarê 85î de mesele resaye destê NATOyî. Dewleta tirke NATOyî hetkarîye waşte. NATOyî dest na şerî ser. Nika zî NATO nê şerî îdare keno. 

Çalakîyê 15ê Tebaxe destan ê. No ruh ewro pê gerîlayanê HPG û YJA-Starî dewam keno. Heftanîn, Zap, Metîna, Avaşîn, Botan, Xakûrkê de; Serhedî ra heta Dêrsimî no ruh zereyê cinî û ciwanan ê kurdan de yê, zereyê kedkar, karker û dostanê kurdan de yê. Ma do serra 38. ya hemle de azadîya Rayber Apoyî qetî bîyarê ca. Nê esasî ser o ma venga her kesî danê ke her ca de 15ê Tebaxe hol fam bikero, tira dersan vejo. Ma Hemleya 15ê Tebaxe Roşanê Gandarbîyayîş ê pêro şarê ma û ê gerîlayan fîraz kenê. 15ê Tebaxe fîraz bo. Roşanê Gandarbîyayîşî fîraz bo.''