Endamê Komîteya Rayberdişî ya PKKyî Duran Kalkanî beşdarê 'Bernameyê Taybetî' yê Medya Haber TVyî bi û rojdem ercna. Qiseykerdişê Kalkanî ra beşêk wina yo:

''Hemleya 15ê Tebaxe ma resnayî na aste. Çalakîyanê selamkerdişê serra 38. ya 15ê Tebaxe zî morê xo da nê zemanî.Gerîlayan Herêmanê Pawitişî yê Medya de, Gever, Botan, Serhed, Dersim, Amed û cayanê bînan de çalakîyî kerdî. Serra 38. ya Hemleya 15ê Tebaxe do biba serra serfîrazî.

Herêmanê Zap, Metîna û Avaşîn de 23ê nîsane ra nata xoverdayîş dewam keno. Heftanînî ra heta Xakûrkê, Gever û Şemzînan çalakîyê bitesîrî yenê kerdene. Ma do prosesê çalakîyan xurtêr bikerê û semedê çinkerdişê AKP-MHPyî derbazê giranan bidê piro. Gerîlayî wayîrê ê hêzî yê ke dişmenî çin bikerê. Pozîsyono bêmesuldar ê PDKyî dewam keno. No pozîsyon beno asten ke ma derbanê giranan bidê dişmenî ro û îşxalî bişiknê. Eke na astengîye dewam nêkera prosesê ma do ser bikewa.

Her ca de vera kurdan dişmenîye esta û tim hêrişî yenê kerdene. Ganî vera nayî kurdî her wextî ra xurtêr wirzê payan ser. Xo rêxistin bikerê, perwerde bikerê û xo nas bikerê. Ganî têkoşîn bêro pîlkerdene ke çew meeşkeno dest û linganê to bişikno û hêrişê to bikero. Senî ke o hêrişê to keno, dişmenîye keno to zî ganî tewr tay hendê ey pozîsyonê hêrişî de bî.  Na dinya wina ya. Eke yew dano ma ro qey ganî heqê ma yê xopawitişî çînêbo? No heqê xopawitişê meşrûyî yo. Ma zanê huqûqê mîyanneteweyî çîn o, dinya de edelat çîn o. Çew vano qey edalet û huqûq estê ma xo sînordar kenê. Ma pê nînan xo mexapînê. Qet cayêk de çîyo ke kurdan sînordar keno çîn o. Eke ê rayêke bidê ma ro ganî ma di reyî bidê înan piro. Ma eşkenê wina dest û milê dişmenî bişiknê.

Dewleta tirke Şingal de da nêweşxaneyî ro. Yew eleqeyê Şingalî bi Tirkîya çin o la ê bi hawayêkê barbarî hêrişê Şingalî kenê. Înan verî Mam Zekîyo ke îradeyê Şingalî bi qetil kerd dima zî şagîrtê ci. Seîd Hesen zî bi şehîdêkê 15ê Tebaxe. Ez nameyê îdareyê PKKyî ser o keyeyê ci û şarê kurdî rê serweşîye wazena, bi hurmetî ey yad kena. 

Eke êzidîyî xoser nêbê, Şingal xoser nêbo qirkerdişê sey 16-17ê tebaxe hema zaf qewimîyenê. Tayênî vanê wa Şingal hêzanê xo vila bikero. O çax kam do Şingal bipawo? La qey dewleta Iraq mendo? Gelo Bexdad de îdareyêk esto? Êzidîyî hînî do Iraqî ra bawer nêkerê. Verê çimanê hukmatê Iraqî de dewleta tirke qirkerdişêk kerd la înan ra veng nêvejîya. Ma têna pê têkoşînî eşkenê payan ser o vinderê. Êzidîyî eşkenê pê xoserîya demokratîke asayî bibê. Çew ney nêdano înan. Ganî ê pey têkoşînî  xoserîya xo bivisnê destî. Ma do qetî qesasê Mam Zekî û Seîd Hesenî bigêrê.

Beşar Esadî qala îdareyêkê nemerkezî kerda. Xora ferzkerdişê îdareyêkê merkezî Sûrîye vista nê halî. Ganî pêro şarê Sûrîye bieşkê mîyanê îdareyî de xo îfade bikerê. Ma hêvîdar ê ke no îdareyo nemerkezî hol bêro ercnayene. Awanîya Sûrîyeyêka demokratîke, îdareyanê herêmîyan û pawitişê xoserîye zaf girîng ê. No do Sûrîye bikero herêmêka modele.''