Federasyonê Komelayanê Karakoçanî (KAR-DEF) bi yew beyanatê nuştekîyî waşt ke Dep û Cevîyê Perrê de yew îdareyo demokratîk, beşdarî û ekolojîk bêro ronayene. Beyanatê KAR-DEF’î wina yo:

 “Welatê ma de, 31’ê Adare de weçînayîş do bêro kerdene. Partîyanê sîyasîyan namzedê xo kerdî kifş. Namzedî do programanê xo bikerê eşkera û dest bi xebatanê xo bikerê. Zîreet ame çinkerdene û xida kewto destê şîrketanê pîlan. Xêrca îstîsnaîyan, îdareyê herêmîyî, xizmetanê xo de şarî nê, sermaye esas gênê. Bi projeyanê santralanê termîkan, bi madenkarîya zernî, bi HES’an, bi JES’an, bi RES, GES, bi çewliganê maseyan, bi rayîr û meydananê teyareyan, awê ser û binê erdî, deştî, wareyî, warê zîreetî ameyî jehrîkerdene û daristanî ameyî talankerdene.

Cevîyê Perrê yo ke Depî zî gêno xo mîyan, bi projeyanê rantî ameyo qirkerdene. Çemê Perrê Erzirom ra virazêno û reseno bendê Kebanî û nê çemî ser o 6 bendî ameyê viraştene. Nê bendê HES’î cuya xozaye û sencîya ekolojîke qedênenê.

Reyna dewa Depî Hamzali de projeyê pêserardiş û vilakerdîşê enerjîyî, dewa Badran de projeyê ocaxa kemeran, dewa Kizilca de projeyê ocaxa mermerî û projeyê sondajê jeotermalî yê awe ameyê plankerdene. Reyna qezaya Çewlîgî Gêxî de, Azarpêrt de, Xolxol de, dewanê merkezî yê Çewlîgî de xeylî projeyî ameyê viraştene û nê projeyî do herême bikerê sey cehenem.

Ma sey Federasyonê Komelayanê Karakoçanî vanê; Ma vera pêroyê projeyê ke Cevîyê Perrê de ameyê viraştene, yan zî do bêrê viraştene mucadele bikerê. Nê projeyî do zerarêkê pîlî bidê xozaye. Ma do paştdarîye bîdê partîyê sîyasî yê ke vera nê projeyan vejînê. Ma herême de îdareyo ke komelê azad û ekolojîkî esas gêno wazenê.”

Ma wazenê ke îdareyê herêmîyî de namzedê ke ekolojîyî, demokrasîyî esas gênê û şarî reyde qerar danê û virazenê bibê û ma do paştdarîye bidê namzedanê winasîyan. Ma do sucanê vera xoza û bajarî de her tim mucadele bikê.”