Endamê Komîteya Rayberdişî ya PKK’yî û Fermandarê Merkezê Pawitişî yê Şarî Murat Karayilan radyoya Dengê Welatî rê qisey kerd.

Karayilanî sere de hemsereka KCD'yî Leyla Guvene û heme xoverdayoxê grevê vêşanîye silam kerdî û vat, “Na çalakîye wayîrê manayêka gird a  û tarîxî ya. Mana û rûmetê ci roje bi roje hîna zêde yeno femkerdene û pêl bi pêl vila beno. Yeno vatene ke çalakîye do zîndanan de hîna hîra biba. Bi nê rengî no do bibo xoverdayîşêkê topyekûnî.”

Karayilanî ard ziwan ke zaf şorişgêr, welatperwer û demokratanê zereyê cimatî bi îradeyê xo tewrê çalakîye bîyê û ard vîrî ke, tewr peynî de Başûrê Kurdistanî de Herêm Mehmud tewrê çalakîye bîyo û vat, ganî her kes peyama na çalakîye fehm bikero.

TECRÎD TEYNA ÎMRALI DE NÎYO

Karayilanî ard ziwan ke tecrîdkerdişê Ocalanî îşkenceyê psîkolojîk, bêhuqûqî, şîdet û binpaykerdişê heqanê merdimî yo û wina dewam kerd: “Labelê tecrîdkerdişê Rayber Apoyî teyna aîdê Îmraliyî nîyo, no sîstemê tecrîdî vera şarê Kurdî yeno kerdene. Vera şaranê Tirkîya û hem şaranê herême yo."

XOVERDAYÎŞÊ VERA TECRÎDÎ XOVERDAYÎŞÊ VERA FAŞÎZMÎ YO

Karayilanî  bale ante faşîzmê Tîrkîya ser û vat, “No faşîzm tecrîdî ra paşt gêno, bi wedaritişê tecrîdî no faşîzm zî do birejîyo. Seba naye zî xoverdayîşê verê tecrîdkerişê Rayber Apoyî, xoverdayîşê vera faşîzmî yo, têkoşînê seba azadî û demokrasî yo. Rastî û cewherê xoverdayîşî no yo. Ma nêeşkayê na rastîye baş rayapêroyî rê bivajê. Na kêmasîya ma ya.’’Karayilanî ard ziwan ke tecrîd sey sîstemêko faşîst zulmê şarê Kurdî keno û vat, “Ganî şarê ma baş bizano ke wedaritişê tecrîdî reyde çi yeno ca. Coka ganî naye ra wayîrê bivejîyo û hîna zêde çalakîyan bikero.”

GREVÊ VÊŞANÎYE YÊ EWROPA GANÎ BÊRÊ GIRDKERDENE

Karayilanî vat, “Ez eşkera vaja; vinetişê Ewropa ra çîyêk fehm nêkena” û ard vîrî ke 14 şorigêrî Strasboûrg de grevê vêşanîye de yê, labelê seke nê çalakîyêkê normal ê, teyna serdana înan yena kerdene. Karayilanî na babete ser o vat, “Ê zî eşkenê 300-400 kesî dest bi çalakîye bikerê. Fehm nêkena çira dest pê nêkenê. Çalakîyê grevê vêşanîye reştî sewîyêka krîtîke. Ganî êdî girsekî biba, beşdarbîyayîşî zêde bê, kes cayê xo de nêvindo û temaşê nêkero. Sewîyêka ke nika reşta ci naye kewena ma ver. Xoverdayoxan bi qiseykerdişanê xo yê heta nikayî, bi tewirê xo îspat kerdo ke çalakîye do netîceye qetî bigêra.”

O YO KE ÇETEYAN WEYE KENO ERDOGAN O

Karayilanî wina dewam kerd:’’Dewleta Tirkî heme hêzanê QSD, YPG'yî ra vana 'Nê PKK yê'. No rast nîyo. Awanbîyayîşê nê rêxistinan û bingeyê nê xoverdayîşan de fikir û zîhnîyetê Rayber Apoyî esto. Nê merdimî teberê PKK’yî de yê  la serê bingeyê fikranê Rayber Apoyî de xo rêxistin kenê û aver de benê. Serkewtişê 5 serranê peyênan o ke Baxozî de resayîyo ci, serkewtişê merdimî yo ke hetê rayberîya şerwananê Apoyî ra ameyo afernayene.

DAÎŞ rêxistinêka şîdet, zulm û terorî ya û bi nê rengî bîyo belayê serê merdimîye. No semed ra wina asan nêqedîyeno. Heta ke AKP bibo, heta ke îqtîdar de bo DAÎŞ nêqdîyeno. Ne DAÎŞ, ne zî El Nûsra qedîyeno, o yo ke înan weyê keno Erdogan bi xo yo.

Bi vatişê ‘Ê yê ke vera min ê, heme PKK yê, dişmenê min ê’ cehd keno ke ê yê ke vera DAÎŞ’î şer kenê bikero hedef. Erdogan naye bîlasebeb nêkeno. Seba ke YPG, YPJ û QSD vera çeteyan şer kenê û projeyê bi nameyê DAÎŞ’î bin kewenê, Erdogan hende dişmenîye keno. Heta ke na rastîye hetê rayapêroyî ya dinya ra nêameye fehmkerdene, heta ke verê nê nêame girewtene DAÎŞ hertim do weyê bikero û bisevekno. Seba ke DAÎŞ bi temamî biqedîyayo dem û têkoşîn lazim o.”

MA KEWENÊ WISARÊKO NEWE

Endamê Komîteya Rayberdişî ya PKK’yî Karayilanî tewr peynî de vat, “Ma dest bi wisarêko newe kenê. Grevê vêşanîye zaf muhîm ê û reştê sewîyêka tewr berze. Xoverodayîşê vera DAÎŞ’î reşto sewîyêka tewr berze û serkewtişê xo do îlan bikero. Vakûrê Kurdistanî de weçînitişê herêman estê. Serra ke zaf bîyayîşî do destpêbikerê dest pêkena. Rolê ke gerîla emser bîyaro ca, rayberîye ya. Aktoro serek, xoverdayîşê gerîla do bibo. Eke gerîla bi nê tarzî têgêrayîş bikero û rolê xo kay bikero,  têkoşînê azadî yê şarê ma do ser bikewo, emser do bibo yê şarê Kurdî; rayraşîyayîşê azadkerdişê Kurdistanî do ser bikewo”