Hemserekîya Konseya Rayberdişî ya Komalên Civakên Kurdistan (KCK) derheqê hêrişê îşxalî yê dewleta tirke yê vera Başûrê Kurdîstanî ke rojanê peyênan de zêdîyayî, eşkerayîya nuştekîye daye û nê vatî:

''Hêrişê îşxalî yê dewleta tirke yê vera Başûrê Kurdîstanî dewam kenê. Nê semedî ra ver bi Başûrê Kurdîstanî sewqîyato leşkerî yeno kerdne. PDKyî rayîrê fermîyî artêşa tirke ya îşxalkere akerdî, cayê ke dewleta tirke tede ya kontrolê ûcayan bi temamî teslîmê ci kerdo. Rewşe ameya wina yew hale ke artêşa tirke cayanê ke tede ya nuqtayê kontrolî nayî ro. No zî mojneno ra ke dewleta tirke çend hêrişanê xo yê îşxalî aver bena  pede pede Başûrê Kurdîstanî de îdareyî gena dest.

Bi wesayîtanê zirxianan sewqîyato leşkerî eşkera û rayîrê fermî ra yeno kerdene. No zî ramojneno ke werte de yew mutabakat est o. Heta nika tim heme hêrişê îşxalî yê dewleta tirke bi paştdayîşê PDKyî nimite ameyî kerdene. Dewleta tirke bi paştdayîşê PDKyî rixmê Iraqî hêrişê îşxalî kerdêne. Nika bi qebûlkerdişê Iraqî kena. PDK zî hinda eşkera paştî dano îşxalî.  Na rewşe newî û tehlukeyin a. Ma bale ancenê na rewşe ser û şarê xo û rayapêroyîya demokratîke hîşyar kenê û semedê hîsgêrîye veng danê.

Dewleta tirke ya îşxalkera ke vera şar û têgêrayîşê ma bin kewte, semedê qirkerdişê kurdan wazena hêzanê dahîna zafan tewrê konseptê qirkerdiş û tesfîye bikero.  Nê hêzan ra yew zî Iraq o. Dewleta tirke ferq kerd ke têna bi paştdayîşê PDKyî nêeşkena Başûrê Kurdîstanî îşxal bikero, kena ke dewleta Iraqî bianco hetê xo. Erdoganî nê semedî ra menga nîsane de Iraq zîyaret kerd. Çi heyf ke dewleta Iraqî bîye tewrê polîtîkayanê îşxal û qirkerdişî. Ma tim bi şar û hukmatê Iraqî dostbî la Iraqî têgêrayîşê ma sey rêxistina qedexekerdî îlan kerd. Eşkera yo ke çarçewaya konseptê qirkerdişî de pêkerdişî ameyî kerdene. Dewleta tirke dişmenê kurdan a û waştişê ci yo verên qirkerdişê kurdan o.

Iraq de dewrê peyênî de tay hedîseyî erzîyenê milê têgêrayîşê ma ser. No zî pabesteyê nê konseptî yo. Karê ke hetê MÎT û PDKyî ra yenê organîzekerdene înan kenê milê têgêrayîşê ma ke îxanet û îşxalî bikerê meşrû. Nê têna îftîra nîyê, eynî wextî planêko tehlukeyin o. Têgêrayîşê ma senî vera wehşetê DAÎŞî Başûrê Kurdîstanî  û Iraq de têkoşîn kerd her kes zano. Coka şarê Iraqî têgêrayîşê ma û Gerîlayanê Azadîye yê Kurdîstanî ra zaf hes keno. Bi nê komployanê leyminan kenê ke şarî têgêrayîşê ma ra bifînê dûrî ke plananê xo yê xayînan bîyarê ca. Vera nê sernayoyanê leyminan hem Kurdîstan de hem zî Iraq de ganî roşnvîr, rayapêroyîya demokratîke û dezgehî hîsgêr bê.

Ganî  no plano ke hetê PDK û MÎTî ra ame kerdene û hukmatê Îraqî zî ame tewrkerdene, bêro teşhîrkerdene. PDKyî bi paştdayîşê xo yê dewleta tirke ya îşxalkere eşkera mojna ra ke hetê qirkerdişê kurdan de yo. PDK têna derdê keye û îqtîdarê xo de yo. Çi heyf ke PDK têna paştî nêdano îşxalê vera Kurdîstanî, seba ke konseptê dewleta tirke yê qirkerdişê kurdan ser bikewo falîyetanê sîyasî û dîplomatîkî rayra beno. Na rewşa zaf tehlukeyin a.  Vera nê ganî tewirêko neteweyî yo xurt û zelal bêro girewtene.  Ganî şarê kurdî, heme rêxistinê Kurdîstanî, partî û dezgehê tewirê neteweyî yê xurt û zelalî ramojnê.

Gerîlayî vera îşxal û qirkerdişî têkoşînê girdî danê. Ma nê têkoşînê girdî yê gerîlayan pîroz kenê, hemrayanê xo yê şehîdan tîya ra yad kenê. Têkoşînê gerîlayan semedê pawitişê Kurdîstanî yo. Têna gerîla û PKK nînê hedefgirewtene, Başûrê Kurdîstanî û ameyoxo  azad ê şaranê ma hedef o. Hedefê înan de destkewteyê kurdan, erjê Kurdîstanî est ê. Vera hêrişan û tewirê hemkarîye, îxanetî ganî sey gerîlayan tewiro zelal bêro ramojanayene. Wa no zaf hole bêro zanayene mabênê kurdan de û rêxistinanê kurdan de pêrodayîş çîn o. PDK eşkera leteyê sîyasetê qirkerdişê vera kurdan o. Ganî her kes nê fam bikero. Ma veng danê şarê xo û dostanê ci ke wa vera hêrişê îşxalî her ca de têkoşînî xurtêr bikerê. Vera hêrişanê qirkerdişî yê topyekûnî ganî her ca de têkoşîno topyekûn bêro kerdene.''