Komîteya Tekîlîyanê Teberî ya KCKyî derheqê hêrişê dewlata tirke yê vera êzidîyan ê vera Kampa Qadîya de eşkerayîya nuştekîye daye.

Eşkerayîya KCKyî wina ya:

''30.08. 2021î de Kampa Qadîya ya qezaya Zaxoyî ya Herêma Federe ya Kurdîstanî, ya ke şarê êzidîyano ke badê qirkerdişê DAÎŞî Şingalî ra ameyo tede maneno, de teqayîşêk qewimîya û di domanan dinyaya xo bedilnaye xeylêk kesî zî birîndar bîyî. Ma înanê ke dînyaya xo bedilnaye rê Hûmayî ra rehmet birîndaran zî şîfa wazenê û reyna vanê ke ma tim  kişta şarê xo yê kampe de yê.

Qiseykerdişê heme  şahîdanê serebûtî ra yeno fehmkerdene ke hêriş hetê dewleta tirke ra ameyo kerdene. La hema ke eslê serebûtî zelal nêbîyo tay selahîyatdarê herêmî yê ke pabesteyê PDKyî yê kenê ke sûcê hêrişî bierzê milê PKKyî. Nê tewir û provokkasyonê selahîyatdaranê PDKyî ramojnenê ke ê wazenê dewleta tirke ya ke vera şarê ma hêrişê qirkerdişî kena bipawê û sûcanê  ci pak bikerê û binimnê. Selahîyatdaranê PDKyî yê ke vera hêrişê dewleta tirke yo ke 16-17ê tebaxe de vera nêweşxaneyê Şingalî ame kerdene, vengê xo nêvet hema ke nêşîyê cayê serebûtî yê Qedîya dest pê sûcdarkerdişê têgêrayîşê ma kerd. Ma nê tewirê înan  şermezar kenê. No yew plano ke bitaybetî ameyo amadekerdene.

Hetê bînî ra hêrişê Qedîya ke badê tîtikê Iraqî û zîyaretê Serekkomarê Fransa Macronî ame kerdene û hetê tay selahîyatdaranê PDKyî ra lazabeze erzîya milê têgêrayîşê ma ra yeno fehmkerdene ke hayîya înan verî ra nê serebûtî ra esta. Bi na wesîle ma veng danê şarê xo ke wa vera nê eşkerayîyanê provokatîfan tewirê xo ramojnê û selahîyatdaranê PDKyî şermezar bikerê.

Ma sey têgêrayîşê sey verî nika zî wazenê ke wa şarê ma yê êzidîyan agêro Şingal û welatê xo newe ra înşa bikero. Semedê paştdayîş çîyo ke destê ma ra bêro ma zî do bikerê. Nê serebûtî reyna ramojna ke zaf hewce keno ke şarê Şingalî herra xo de xo îdare bikero û bipawo.  Bi na wesîle ma veng danê hukmatê Iraqî, PDK û hêzanê mîyanneteweyî ke wa kayanê leyminan ê serê êzidîyan caverdî û rayapêroyîya dinya ra zî wazenê ke wa paştî bidê waştişanê meşrû û heqdar ê şarê êzidîyan.''