Komîteya Bawerî û Şaran a KCKyî bi wesîleya 2ê temmuze eşkerayîya nuştekîye daye. KCKyî sere de êyê ke qirkerdişê de ameyî qetilkerdene bi hurmet yad kerdî û sozê caardişê waştişê înan da.

Eşkerayîye de nê ameyî vatene:

''Dewleta tirke bitaybetî 1960an ra dima qirkerdişê vera elewîyan de pîya bi kontragrîlayan grûbê sey neteweperwer û dîndarî zî şuxulnayî ke sey ''hersê musluman ê vera elewîyan ramojnê.'' Bi nê taktîkî waşt ke elewîyan xeta neteweperwere û laîke de tepişê.

Înanê ke qirkerdişê vera elewîyan organîze kerdî tetîkkarîya ci kerde ewro binê nameyê AKP-MHPyî de îqtîdar de yê. Êyê ke îdeolojîyê fermî yê dewlete temsîl kenê û binê nameyê muxalefetî de yê pê hesasîyetê rejîm û dewlete tim paştî danê înan.  Coka her qirkerdişê vera elewîyan yeno waştene ke xorîyîya dewlete de bêro vînîkerdene.

2ê temmuza 1993î de Sêwas de reyna elewîyî rîyê bawerî û ercanê cuya demokratîkî ke temsîl kenê ra hetê dewleta tirke ya faşîste ra ameyî qetilkerdene. Nê qirkerdişî sey qirkerdişê  tewr wehşî yê dewlete yê vera şaran û bawerîyan tarîx de cayê xo girewt.

Îqîtdarê AKP-MHPyî ke sentezê îslamê tirkî ferz keno, Kiştoxê Sêwsî efû kerdî û avûkatanê ke nê kiştoxî pawtitî ê zî kerdî wekîl û wezîrî ke xeta ke temsîl keno ramojna.  Ma wazenê reyna vajê Koçgîrî ra heta Sêwas berpirsîyarê heme qirkerdişanê vera elewîyan zîhnîyet û sîyasetê  wayîrê sentezê îslamê tîrkî yo. 

Dewleta tirke wextê ronayîşê xo ra pê înkarkerdişê şaran û bawerîyan estbîyayîşê xo domena. Kam ke vera na stratejî vejîyo pê qikerdiş û qetlîaman cewabê ci dana. Nasnameyê ke dewleta tirke roja verêne ra înkar kena ra yew zî kurd û elewî yê. Coka bitaybetê îqtîdarê AKP-MHPyî wazeno pê hêrişan kurdan û elewîyan çîn bikero. Dewleta tirke qirkerdişê xo yê vera kurdan kiriştê teberê Vakurê Kurdîstanî û dişmenîya xo ya vera kurdan û bawerîyan ramojnena. Eke verê nê hêrişan nêro girewtene do qirkerdişê ke tarîx de nêameyî vînayene bêro qewimîyayenê. Coka ganî vera nê îqtîdarî têkoşîn bêro pîlkerdene ke verê qirkerdişan bêro girewtene.

Pê Qirkerdişê Sêwasî ame waştene wa hêzê demokrasîyî yê Tirkîya û têgêrayîşê azadîye yê Kurdîstanî pîya têkoşîn nêkerê. Qirkerdişê vera elewîyan eslê xo de hêrişê vera demokrasîyê Tirkîya yo zî. Ganî sere de elewîyî heme hetê demokratîkî vera faşîzmî têkoşînê demokrasîyî pîl bikerê. Bi wesîleya 2ê temmuze veng da elewîyan ke wa rayîrê heqîqatî ke tira bawer kenê de vera faşîzmê îqtîdarî pîlêr tewir bigêrê. Ma reyna şehîdanê Sêwas û Çorumî bi hurmet yad kenê û sozê newe kenê ke ma do têkoşînê Tirkîyaya demokratîke û Kurdîstanê xoserî bi serkewtişî tacîdar bikerê. Ma pê bawerê ke îdarekarê têgêrayîşê demokratîkî yê elewîyan û dezgeh û rêxistinî do berpirsîyarîya xo ya tarîxîye bîyarê ca û layikê cananê şehîdan bê.''