Hemserekîya Konseya Rayberdişî ya KCKyî bi eşkerayîyêke qurbanê Qirkerdişê Gelîya Zîlane yad kerdî. Eşkerayîye wina ya:

''Ma serrgêra Qirkerdişê Gelîya Zîlane de yê ke rêçêka girane hiş û vîrê şarê Kurdîstanî de verdaya. Dewleta tirke ya kolonyalîste bi seyan dew, bajarekî vêşnayê; doman û îxtîyarî zî rede bi hezaran kurdî qetil kerdî. Ma nê qirkerdişê barbarî ancî şermezar kenê. Ma qurbanan bi rêzî yad kenê. Şexsê înan de ma pêro şehîdanê demokrasî û şorişî bi hûrmet û minetî yad kenê, verê vîrameyîşê înan de rîyê xo anê war û sozê xo yê seba şehîdan dibare kenê.

Qirkerdişê Zîlane îmhaya pêro kurdan armanc kerdbî. Gelî û newalê Kurdîstanî bi kurdan ameybî dekerdene û wina qirkerdiş amebi kerdene. Qirkerdişê Gelîya Zîlane xorinîya dişmenîya dewlete ya vera kurdan eşkera keno. Dişmenîya dewleta tirke ya vera kurdan sey Qirkerdişê Dêrsimî Qirkerdişê Zîlane de eşkera bîye.

Qirkerdişê Zîlane verê çimanê pêro dinya de ame kerdene la çewî verê nê qirkerdişî de dewleta tirke rê vengê xo nêkerd. Ewro zî dinya  verê qirkerdişanê dewleta tirke de bêveng a. Ma nê tewirê bêvengîye şermezar kenê û hişyar kenê ke wa hinî dewletî paştî nêdê polîtîkayanê dewleta tirke.

Bêguman nê teda, hêriş û qirkerdişî bi tewirê azadîye yê kurdan nêeşkayî. Agirî, Dêrsim, Mehabad, Qamişlo û Helebçe de xoverdayîşê kurdan nêqeda. Rayber Apo 1977 de şi warê Qirkerdişê Zîlane, ey şorişgêranê kurdan de kombîyayîşo hîra yo verên kerd û gamê têkoşînê azadîye eştî. 

Nika zî polîtîkayê qirkerdişî yê vera kurdan hetê îqtîdarê AKP-MHPyî ra yenê caardene. No îqtîdar seba ke kurdan qir bikero bêmabên hêriş keno. Hêrişê îşxalî yê vera Başûrê Kurdîstanî yê nikayênî dewamê ê hêrişan û qirkerdişanê tarîxîyan ê. PDKyo hemkar zî bîyo parçeyêkê polîtîkayanê qirkerdişê kurdan. Nê wextî de ke ma qurbananê Qirkerdişê Gelîya Zîlane yad kenê, hêrişê îşxalî yê vera Kurdîstanî û îxanetî şermezar kenê venga şarê xo danê ke vera îxanet û îşxalî xoverdayîşê topyekûnî bikero.''