Gerîlayê ke Şikefta Birîndara de yê vat 20 rojan ra zafêr o ke cenazayê 20 leşkeran Kevirê Kun de yê.

Gerîlayan destûr nêdanê helîkopterê skorskyî bikewê herême, leşkerî nêeftayî erdî ra şirê û qoricî zî ser nêkewtî. Cenazayê leşkeran 20 rojî yo herêma Kevirê Kunî de manenê. Artêşa tirke ya ke cenazayî helisîyayîşî rê verdayî derheqê înan de eşkerayîyêke zî nêdana.

Artêşa tirke mabênê 14-17ê nîsana 2022yî de herêma Şikefta Birîndara ya herêma Zapî daye bombayan ver. Artêşa tirke ya ke îdîa kerdêne ke herême de hema hema pêro gerîlayî îmha kerdî, 17ê nîsane de pê helîkopteranê skorskyan sey waranê bînan ê Zapî leşkerê xo kirişî herêma Şikefta Birîndara.

Gerîlayê ke tunelanê şerî û erazî de bî a şewe destûr nêda helîkopteranê ke binê keşîfê tewr tay 4 teyarayanê keşîfî de leşkeranê warê Şikefta Birîndara de ronê. Helîkopteranê ke derbeyî werdî mecbûr mendê ke herême ra bikewê dûrî.

Artêşa tirke 18ê nîsane de û badê ci bi hêrişanê giranan ê hewayî, pirodayîşanê kobrayan waşt erdî ra bikewo herême û xo tîya ca bikero; nêzdîyê tunelanê şerî yê herêma Şikefta Birîndara bibo. Tîmê bitêgêr ê ke sereyê şerî ra aktorê tewr muhîmî yê têkoşînî yê hema cehdkerdişê dewleta tirke ê verênî de leşkerê tirkî peyser qeldayî û destûr nêda leşkerê bêrê nêzdîyê tunelan.

Leşkerê tirkî seba ke hedefê gerîlayan mebê xo ser o sîwan û varanî akerdî û remayî la leşkeranê ke nêzanayêne sîwanî senî abenê, gama ke remayêne bîyî hedef.  Leşkeranê tirkan ê ke merdeyê xo kiriştê Kevirê Kunî yo ke tunelanê şerî ra dûrî yo û erazî ra vila bîyî.

Gerîlayê ke Şikefta Birîndara de yê vat Kevirê Kun de 20î ra zafêr cenazayî est ê ke serê înan pê branda û varanîyan ameyo kamuflekerdene. Seba ke gerîlayan destûr nêda ke helîkopterê skorskyî bikewê herême cenazayê leşkeranê tirkan erdî de mendê. Artêşa tirke ya ke nêeftana erdî ra bikewo herême û cenazayanê xo bîgêro qoricîyî şawitî herême û la qoricî zî sernêkewtî.

Dewleta tirke ya ke derheqê aqibetê leşkeranê ke berdê Şikefta Birîndara de eşkerayîyêke nêdaye seba ke vînîbîyayeyanê xo binimno tim xeberanê zûran servîs kena.